偷懶半天

上午考完第二科．
一早預咗會考得麻麻．
入到去果然啦．
statute唔記得section 幾．
案例名又唔記得．
成個答案好以淨係吹水咁．
無law back up....
死咗一半啦!

但係考完後，點都要放鬆一下．
先到apm食個lunch.
我已經好耐冇食午飯啦!
(溫習時為節省時間只會食早餐同一個飽飽下午茶)
今天吃的是意粉，味道好一般．

跟手係apm行咗陣．
買咗對新波鞋
(事實又一次証明shopaholic唔買嘢係唔得既!)
原想買嗰對Nike，好看點，但係冇air囉．
所以最後揀咗對冇咁靚，但係有air既．
舒服啲麻!

諗過睇戲，可惜揀唔到．
之後轉移陣地，出咗旺角行朗豪坊．
食咗個tea.
有cheese cake, brownie　同hot hazel nut chocolate!
我冇計過卡路厘，
淨係知道而家八點幾都仲好飽．

完完全全是放縱的一天．
因為放縱，所以放鬆．
明天再努力!
奸爸爹!

點算?

五日假期．
如意算盤是一天大概溫25-30%，
即係三四天會溫完一次，
第五天係用黎重溫同睇past paper既，
但係噚日只係溫咗約15%，
今日得返一半．
點算?點算?

家有囍事

今晚從小妹口中得知．
姐姐會在今年年尾結婚啦!
等咗咁耐，終於到我屋企啦!
可能我都需要加入大家既手作仔手花襟花行列啦!

下次你地再做手工小組時(五月之後既)．
唔該預埋我!

胡思亂想

太忙，太累．
唔太高興時，我會胡思亂想．

昨日又有古怪嘢．
如果我今日死咗，有邊個會喊呢?
家人應該會．
朋友當中，兄弟們應該會．(應該會吧?!)
尤其是其中幾個較感性的．
其他的朋友，唔太肯定．

本來我想post係臉書到問大家的．
但係嚇親人就唔多好啦．
所以最後都冇做到．
淨係自己想想想．
又浪費了點時間．:p

沾沾自喜

放工時，閒談間被問到溫習溫到幾夜．
而家平均溫到一點．
上年考試放假期間就兩三點．
第二朝八點幾九點起身再溫．
對方話，咁都冇眼袋，你keep得好好喎，好犀利喎!
yeah~ \(~o~)/

明知係恭維，我都會沾沾自喜．
係!我膚淺!我認! :p

是日收穫

Sofina 防曬SPF50+ PA+++
盛惠:$290-

購物狂

係壓力下，最好的抒緩方法便是購物．
我係呢個時候會縱容自己花費．
除咗出入會搭多咗的士之外，我仲會亂買嘢．

例一：
昨日午膳時間，係公司溫咗一個鐘頭書後．
最後頂唔順，於是去咗Godiva買咗二百蚊朱古力，
起碼食下朱古力個人唔駛咁灰先．

例二：
今晚八點放工，
行過連卡佛，就走咗去Dior，
買咗講咗好耐都未買既eye cream，
承惠四百六十大元．
我都知係貴，
但係都係嗰句啦!
讀得咁辛苦，無謂刻薄自己．
反正都係用返係自己身上啫!

Study Group

就黎考試啦，所以今日去咗個同學仔屋企．
大家諗住做個study group．
可以一齊溫習．有問題提出討論．
但係作用唔大囉!

大家進度唔同．
想溫既嘢唔同．
溫習方向唔同．
況且時間無多，
大家都只想溫自己想溫既嘢(最少我係)．
而且人多又會傾計．
攪到事倍功半．
如果我今日自己留係圖書館溫，
應該會溫多好多．

不過今日都幾開心．
幾個人有傾有講咁，咁又一日．
仲有今日講既英文應該係我過去幾年講既總和囉．
大學畢業後都冇乜點講過啦!

仲有好彩我今日有去，原來我將兩科既考試日期掉轉咗．
今日同同學仔傾開計至發覺!
好彩為時未晚．影響不大．
聽日真係要認真的溫至得啦!

求醫

今日又去咗睇中醫．
因為個頭由噚日開始就痛．
但係噚晚要返學，去唔到．

初時以為係比風吹親又或者感冒．
原來又係話我寒．
次次都係咁講，好悶．
所以我每次都盡量諗啲問題問吓．

問題一：
如果個人緊張，把脈把唔把得到?
答案係得既．
咁我緊唔緊張呢?
醫師答：之前唔緊張． ==>潛台詞即係而家緊張啦
我：咁而家．．．
醫師答：而家係好緊張．．．

問題二：
點解我成日都喺夜晚六七點時超眼瞓．
但係八點開始就越黎越精神?
醫師話因為我個人虛．
而人既唔知乜乜少陽經(已經唔記得咗係邊條，可能睇返段譽會知道)
係下午三點至六七點，血氣運行會由最強漸轉弱．
加上太陽下山後個人既血氣更差．寒氣更盛．
而我一直太勞累，下一道氣又補唔切，所以會咁．

一般人如果咁攰，夜晚應該會好好瞓．
但係我係晚上仍然又好多嘢做．
一直透支，扯到行晒．
個人又超緊張．
所以到夜晚都係會瞓得唔好．

但係而家係非常時期，唔可以鬆懈．
仲有一個月啫!
加油!!

又：由於頭痛，今日醫師同我按咗幾吓，按完後又真係唔痛喎!掂!
又又：答咗佢今日早餐同午餐食乜後，被嚴肅地｢循循善誘｣了幾句．
　　　但係而我暫時仲未諗到乜食比好，諗到先算!

專心溫習

我在家很難集中精神溫習．
家中有電腦，小說，床舖，家人．
要溫習，便要去圖書館，自修室．

而且一定要很靜．
時間愈來愈少，人愈來愈緊張．
連選個位也很挑剔．
選到好的，便不願轉．

最好係角落位．
唔好係路口．
身邊車水馬龍咁，點集中呀?

有時連旁邊的人的呼吸聲也會令我心煩．
但係唔通你唔比人呼吸咩！
無位，又無得走．

唯有聽歌．
不過選歌很重要．
一定要選熟悉的．
唔熟既話，
個人副精神就會去咗聽歌．
留意歌詞，旋律．

熟既話，隻歌會變成我的背景音樂．
就像電梯，酒店，商場的音樂．
你會唔多覺佢係度．

不過，最專心當然係喺絶對寧靜的環境下溫習啦！

聽不到

今個星期係:聽不到
原唱係五月天



♪　♪　♪　♪　♪　♪　♪　♪　♪　♪　♪　♪　♪　♪　♪　♪　♪　♪
聽不到歌手：梁靜茹
作曲：阿信(五月天)
填詞：阿信(五月天)
編曲：阿信/周恆毅

夜　黑夜　寂寞的夜裡
氣　生氣　對自己生氣
軟弱的電話　又打　給你
想　聽你　那邊的空氣
有　什麼　精采的話題
你還是溫柔　給我　婉轉　的距離

＊我的聲音在笑　淚在飆　電話那頭的你可知道
　世界若是那麼大　為何我要忘你　無處逃
　我的聲音在笑　淚在飆　電話那頭的你可知道
　世界若是那麼小　為何我的真心　你聽不到

會　很會　偽裝我自己
你　不該　背我的秘密
沈重都給我　微笑　給你
奔　狂奔　空曠的感情
走　暴走　暴走的傷心
透明的嘆息　最後　還是　我的秘密

Repeat ＊

聽不到聽不到我的執著
撲通撲通　一直在跳
直到你有一天能夠明暸
我做得到　我做得到

Repeat ＊
♪　♪　♪　♪　♪　♪　♪　♪　♪　♪　♪　♪　♪　♪　♪　♪　♪　♪

得?失?

自畢業後，一直有進修的打算．
因為現今社會競爭激烈，唔自求多褔的話，遲早被淘汰．
然而一直都唔知讀乜好．
所以拖拖吓到上年才的起心肝．

其實報名前已經知道並不容易．
低合格率，而且出名辛苦．
並不是可以隨便濛混過去便合格的．
成日要上堂，仲有大量筆記要睇．
那些文章可不是說笑的．
一個段落，可能看三數次也不明．
一頁大既有六七段，
一個科目有大既三百頁，
一年要唸三科．
條數．．．

其實我是喜歡讀書的．
我喜歡學習的過程．
喜歡學到新知識後的滿足感．
喜歡返學可以結識到新朋友．

但我也喜歡玩．
喜歡無拘無束的過日子，hea時間~
如果我沒唸，我一共可以省下十多萬．
一年可以多二三百個小時上堂時間省下．
仲有溫習時間．
日子可以過得舒泰一點．
(應該可以老得慢啲添!)

有時我會想:
花那麼多時間，金錢．值得嗎?
現在唸了，我的工作是不是真的有保障呢?
還有我的工作前境．都係未知之數．
究竟是得的多? 還是失的多?

費事同你講

好多時，很多人，
硬是記不住你講過的說話．
又或者一些關於你的事．

銀行金融業，畢業後便工作至今．
我做後勤既．
從來．
係．從．來．
都唔需要著制服．
唔駛見客．

你冇留意，又或都唔發覺都算．
但係同一個問題唔駛問完又問囉．
答咗又唔記得，咁我答黎做乜?
係我記憶中最少係第三次問啦！

聽到後，想鬧！
最後都忍住．
只拋下一句：費事同你講！
然後出門返工！

如果我

買了張敬軒的新碟．
聽聽下卻突然想起他的舊歌<如果我>．
上Youtube找找看．
可能太舊了，加上演唱會沒唱過，沒有MV．

看看歌詞，原來作曲填詞的都是王菀之．
較早前看到一篇張敬軒的訪問．
提到他和王菀之的關係真的很好．
好到坐在車中是會拉手的．
嗯．會拉手的，應該真的親密得有如家人了吧!


♪　♪　♪　♪　♪　♪　♪　♪　♪　♪　♪　♪　♪　♪　♪　♪　♪　♪
<如果我>
(收錄於06年的大碟<春‧夏‧秋‧冬>)
作曲：王菀之
填詞：王菀之
編曲：Alex(The Invisible Men)

聽見你哭泣時我的心也陪著你流淚
誰讓你哭　也讓我沒法入睡
差點忘了自己　是你自己　不能有誤會
只好在你身邊的時候偷偷心醉

如果我　說愛你
你會否　繼續和我唱遊天地
不敢說　我愛你
害怕你忽然之間給我距離

聽見你哭泣時我的心也陪著你流淚
誰讓你哭　也讓我沒法入睡
差點忘了自己　是你自己　不能有誤會
只好在你身邊的時候偷偷心碎

如果我　說愛你
你會否　繼續和我唱遊天地
不敢說　我愛你
其實我更怕你已變成我的唯一

如果我　很愛你
也許有一天你愛我的甜蜜
我已經　很愛你
現在還需讓秘密收進心底

繼續疼你是自己　我應該可以

♪　♪　♪　♪　♪　♪　♪　♪　♪　♪　♪　♪　♪　♪　♪　♪　♪　♪

打打氣

只有幾句:

1. 一世人流流長，總有不如意事發生.
遇到錯折時，我們可以做的，就只有面對．
人，就是這樣成長的．

2. 聽到妳昨天和明漢的通話和今天的Sms，覺得妳長大了．

3. 記住妳講過要tough!

4. Auntie, Uncle, 城城，仲有明漢，加油!

Pole Dance

朋友帶我到尖沙咀的酒吧，
觀賞生平第一次的Pole Dance．

從來，印象中的鋼管舞都是在一個氣氛熾熱，
燈光灰暗，音樂震耳的地方中的．
舞蹈員會穿著性感舞衣，
嘴唇半張，雙眼半閉，
隨著音樂，火辣的擺動著身體，四肢，
柔若無骨，意態僚人，
卻又有力的在鋼管上做出難度極高的動作．
令人驚訝之餘，又會想入非非．

然而昨晚的環境，音樂總是不對．
吧枱上鑲了兩枝鋼管．
舞蹈員就是在吧枱上表演．
但吧枱旁泊著兩張枱，係貼住泊，並且有顧客在座．
即係話如果腳踏六七吋Platform高跟鞋的表演者動作大點，
轉個圈大點，對鞋就會哼到客人個頭．
可能就係咁，跳得硬係唔夠放．

另外音樂只是一般快歌．
不是意帶挑逗那種．
我記得最差的一隻令我想起Eric Clapton．(-_-")
(我可是頗喜歡他的,但不是用作伴鋼管舞囉!)

舞蹈員有兩位，一位亞裔人(估計係泰國人)．
另一位則金髮(估計是染的)．
身材高佻，均勻．
舞姿都Ok，一樣有在圍著鋼管飛轉，倒吊等難度動作．
但並沒帶給人暇想的那種感覺．

個場最Ok既地方，係冇乜人食煙，
但係啲侍應就怪啲囉!

真係做得好?

近兩個星期，常常要加班，
真的很累．
雖然阿哥常叫我分啲比佢做，
但係佢平時都晚晚八九點至走，
我點好意思比佢呢?
大家一齊加班啦!

阿哥係朱古力愛好者．
櫃中常儲有朱古力，
仲要係唔貴唔買．
久不久也會請我品嘗一兩種．
佢唔係請你食咁簡單，
佢仲會介紹一吓隻朱古力．

之前請過我食VERO的Lemon Drops 同Sesame Pencils，
昨晚送了我一片Amedei的Porcelana．
仲特意介紹，叫我不要小看那小小的一片Porcelana．
原來Porcelana係唯一一種全用Criollo可可豆製成的朱古力．
Criollo是三大可可豆中最稀有的一種，
Amedei則以高價包下了它的夢幻產地委內瑞拉的Chuao小鎮的所有Criollo可可豆，
製成Porcelana，每年只限售二萬盒．

另外今日午膳時，公司冇晒人，
佢又突然走出來，送我一盒Jean Paul Hevin．
哇！又有得食?
電話都唔講住，要同佢傾兩句，講咗多謝先．
佢話阿姐讚我(最近的special task)做得好，
係唔係呀?
仲有阿X同阿Y(Sales Team 兩個阿姐)都讚我喎．．．
有人讚都開心．
起碼辛苦得黎有人(最緊要係老細)知嘛!
但係佢叫我唔好比同事W知囉．

不過隔咗一陣我又諗到啲嘢，
昨天同事W經佢提名，攞咗Employee of the Month，
可能佢怕我冇份會唔開心啩．

但係乜我比人印象係咁小家嫁咩?
佢攞都正常吖，我年資最短，排隊都係佢先啦!
而家佢攞咗，有獎金，我地最少都可以屈餐下午茶．
Yes!

小地震

小休後的第一個工作天，
出奇地早了回到公司，
返到去，係最早既一個．
好靜，但係就見到隔離位個同事個櫃打開晒，冇鎖．
唔通噚晚走得好急?
但係佢平時個櫃唔鎖都唔會打開晒格!

稍後兩個同事回到來，
一見我就話我早，然後就問我係咪知道咗啦?
知道咗?知咩呀?有咩係我應該知嫁?
原來有個同事噚日收到大信封，被炒了．

我們小隊原本第屬於商業銀行部．
上年的一次重組，小隊一分為二．
編制上一半人轉到了營運部．
但工作上仍是一個團隊．
工作性質亦沒變．
對我地黎講就只係在公司結構上的老細轉咗．

受害人原來屬於營運部，上年重組後才轉來．
佢就剛相反，老細沒變，但係其他嘢就唔同晒．
不過係人都知佢同營運部阿姐唔妥(雖則我諗冇人妥嗰個阿姐)

昨日上午十點幾，先由阿哥收到營運部阿姐來電，
一黎就話有有關其他同事既Private & Confidential事講．
講完至同我地小隊阿姐講．
到十一點幾，營運部阿姐同人事部代表黎到派信．

作為全球其中一間蝕水最勁的銀行，
裁員都預咗，估唔到既係負責人的手法．

在公，全個過程都冇問過商業銀行部既人，
連我地香港區主管都唔知．
話炒就炒，要交人，又唔見你交自己既人．
都算，冇人想少個人幫自己做嘢．
但係你要炒既係喺人地地方做嘢既人，點都要知會聲啩．
到炒嗰一刻至通知人，擺到明唔比面，
亦唔比機會人做嘢救人．
再者，人地都要安排工作架!
如果比咗啲重要嘢佢跟，人又比你炒咗，咪比你累死?

在私，人地話晒都係度做咗十幾年，
比得個一個鐘人地執嘢，
仲話要叫人睇住佢執喎！
痴線架，自己又唔睇?
人地而家唔係做錯嘢喎至被炒喎，你當人賊呀?
唔係咁做嘢啩?

煩惱絲

又想整頭髮．
而家個頭唔知想點咁，飛起晒．
頭髮己直了幾年，但我懷疑我不是太適合鬈髮．
想再燙個負離子，但又不想花一整天呆坐在髮舍．
好像很浪費時間似的．．．

無聊時翻看舊照，上年一月時．
頭髮比現在長一點，好像好看一點．
近幾次理髮都得不到滿意的效果．
總覺得差一點，差一點．．．
想轉理髮師．
想轉個心情．

如果沒有

想係Youtube找如果沒有的mv.
結果找到這個廣告,覺得好搞笑.
開首的對白和如果沒有的歌詞可是一樣的啊!

垃圾桶

垃圾桶我常用的有幾個．
有事便會blah blah blah 的在電話，msn中對他們說．
要找個好的不容易．
基本是要是好朋友．
然後要有信心他不會四圍同人講．

很久沒對他說心事．
今晚特然想找他談．
講完了，雖然問題還在．
但都舒服了點．
又要說謝謝了．

禮賓府開放日

較早前看到理工的杜鵑花開得很美，
想起前港督府的開放日應該快到，
上網一找，原來今個星期日便是，
把握機會去逛逛．

那兒很多人，真的很多人．
花．．．ok 啦，
電視上看起來比較美．
如果人少啲應該會好好多．
地方比想像中細，不過都幾靚．
我懶，唔想寫咁多．
係咁!

當真？

昨日去了舊同事的婚禮，
見到了一位自離職後再沒見過面的同事．

最初見到他望著我很久．
但當時正在和其他人寒暄中，未暇打招呼．

稍後才有機會談話．
他：xxx，是你？我完全唔認得你．
　　真係唔認得．
我：(厚著面皮問)係咪因為我靚咗好多呢?
他：係呀，真係靚咗好多！
我：真係？
他：真係嫁！真係靚咗！
我：哇！你再講我會當真嫁！
他：我係講真嫁！
我：多謝！多謝！你真係好好人！

見佢個樣好誠懇，
同埋佢唔係嗰啲口花花既人，
我決定當真，
很高興呢!

梁靜茹今天情人節演唱會

第一次看梁靜茹的演唱會．
一行六人．
揮動著粉紅營光棒，
每一支歌都跟著唱．
好彩冇耐前已經煲咗佢隻精選碟，
所以隻隻都識唱．

可惜歌與歌之間總要關一關燈，
就像cooling off period，
情緒不能連貫下去．
加上梁靜茹的歌都是中板情歌，
快歌欠奉，絶對沒看陳奕迅，張敬軒般high．

然而一個晚上，六個人，一起唱了一晚，
也很快樂．

你咪理，我愛你，死未？

睇咗呢個劇，都ｏｋ既，幾好笑．
佈境同舞台各個效果幾靚，
但正如兄弟話，我有份比錢整既．
好耐都冇比咁多錢黎睇舞台劇啦！

全程主要係歌，
本人最欣賞林二汶的聲音，很好聽！
很明顯佢唱得最好！

還有，四個人不停咁轉造型，
不過無乜大驚喜．
可能因為是第一埸的關係，
有啲蝦碌，有時light cue sound cue出個時間唔對．

但座位很好，是circle的最後一排中央．
看得很舒適(撇除前面那對痴男怨女的騷擾)．
謝謝李小姐的訂購服務！

其餘的．．．
我懶寫，請看李小姐的部落格．

脫髮

這幾年斷斷續續的，
都會脫髮．
唔係話正常人每日甩一百幾十條嗰種喎．
係好似人地俗稱鬼剃頭嗰種．
即係頭上會有一處冇晒頭髮．

通常小則就好似一個五蚊銀咁大．
試過最大有成四個五蚊銀咁大．
那時是我最感激阿媽生成我把頭髮咁厚的時候．
因為脫髮範圍咁大都仲可以遮得住!
通常甩到咁常吓就會慢慢生番．
但係由甩到全部生番晒，最長試過要年幾兩年囉!

昨日尖完吹頭的時候發覺我又有脫髮啦．
係太陽穴對上．
範圍大約五蚊銀咁大．
其他地方都是濃濃的，
剩係嗰度稀疏得很，
輕輕一撥便見到頭皮．
一見到就愁．

以前查過脫髮的成因有好多．
可以係遺傳．
可以係壓力．
可以係心理．
可以係營養不良．
又或者係內分泌失調．

我試過問醫生，髮型師，
但係冇人幫到我，
次次都係佢自己好番既．
只可以等!
唉!唔知又要幾時至生得返啦!

我的零碎小事

見到很多人在寫，自己都寫啲先！

1. 覺得太少的東西：衫褲鞋襪，時間，朋友，手袋，飾物，護膚品，錢．

2. 覺得太多的東西：要做的事(不論大小)，公司的依貓，要溫的書，零碎的個人小物品．

3. 現在的工作只可稱一般，但係工作環境OK，所以在金融海嘯的陰霾下更想賴死唔走．

4. 現時最想去旅行同玩．

5. 張敬軒最近的歌好像麻麻地，有啲想變心．但梁靜茹SHE還是在聽．

6. 為咗保持過年前收拾整齊的房間樣子，現在(暫時還是)堅持每一兩天便要將穿過的衫摺好掛好，收入衣櫃．

7. 喜歡爽快及隨和的人．

8. 好憎人(用質問的語氣)問我：點解咁耐唔搵我?次次都要我搵你先!

9. 好想可以好似以前咁，一覺瞓到大天光．

10. 喜歡甜食．

11. 希望家人，朋友都可以健康快樂．

12. 這刻沒夢想/理想．

13. 想抽多點時間做運動．

14. 討厭被人騙．

食慾不振

己經持續幾天冇胃口，唔多想食嘢．
唔知肚餓，就算餓都冇食慾．

平時唔餓都會係咁摷嘢食家麻！
而家一件切蛋可以撐大半天．
到午飯時段都係應酬吓自己食個飽算．

噚晚因為上堂冇吃飯．
今晚個胃更像墜了鉛般．
但阿媽煮咗飯，唔可以唔食．
於是將盛了半碗的飯減半．
食四分一碗作罷．

早兩天看了中醫，
但還未有時間煲藥．
阿媽開始睇唔過眼啦．
可能明天就會幫我煲．
咁様餓幾日，又唔見有得瘦，蝕！

情歌

剛剛看到這MV．
連MV聽，支歌好聽好多!



♪　♪　♪　♪　♪　♪　♪　♪　♪　♪　♪　♪　♪　♪　♪　♪


梁靜茹 《情歌》
詞：陳沒
曲：伍冠諺
編曲：陳建騏

時光是琥珀 淚一滴滴被反鎖
情書再不朽 也磨成沙漏
青春的上游 白雲飛走蒼狗與海鷗
閃過的念頭 潺潺的溜走

命運好幽默 讓愛的人都沉默
一整個宇宙 換一顆紅豆
回憶如困獸 寂寞太久而漸漸溫柔
放開了拳頭 反而更自由

慢動作 繾綣膠捲 重播默片 定格一瞬間
我們在 告別的演唱會 說好不再見

你寫給我 我的第一首歌
你和我 十指緊扣 默寫前奏
可是那然後呢

還好我有 我這一首情歌
輕輕的 輕輕哼著 哭著笑著
我的 天長地久

長鏡頭 越拉越遠 越來越遠 事隔好幾年
我們在 懷念的演唱會 禮貌的吻別

陪我唱歌 清唱你的情歌
捨不得 短短副歌 心還熱著
也該告一段落

還好我有 我下一首情歌
生命宛如 靜靜的 相擁的河
永遠 天長地久

讓我睡

幾年前開始，晚上總是睡不好．(但上堂時又總是睡著)
一個晚上，醒好多次．
當中還夾雜著好多個夢．
第二日瞓醒，好似冇瞓過咁．

慢慢開始為了有一覺好睡，
便吃藥丸．

前晚頭痛，整夜又睡不好．
於是昨夜便打算吃一粒睡眠丸至瞓．
十一點幾食，十二點上床．
一直躺在床上．
然而睡不著就是睡不著．
個腦仍然好活躍，好多嘢諗．
個胃仲要好唔舒服！

淩晨兩點，決定起來．
橫掂瞓唔著，溫一陣書啦．
可能有用呢?平時溫書嗰陣咁眼瞓．
點知今次又唔眼瞓，又溫到喎！
激死!
再去沖杯薑茶飲，希望個胃會好啲．

三點，熄燈再瞓．
都係輾轉反側，一直到四點至瞓著．．．
今朝仲要一早返工．
想死！

我只想瞓一覺，點解都咁難?
唔該今晚比我瞓好啲啦!

Shopaholic shops again!!

今期買咗好多護膚品同化妝品．
清單如下：

Ipsa：
1. Pure Protect Liquid Foundation
2. Refiner Water Massage
3. Cleansing Oil
4. Skin Beauty Nail Enamel

Soigne:
1. Curecustard Mask
2. Whitesift Melanocalm Mask Plus

雪花秀:
1. 藝瑞粉底液
2. 與潤面膜

以上全部都係今個月買既，已花了二千元．

存貨尚有：
26片我的美麗日記面膜．
我的美麗日記及Ipsa On The Peak 眼膜各兩對．
今個月頭剛開封的SKII神仙水(250ml)
還有其它碎濕濕的．．．

今天還看中了Estee Lauder的Future Perfect Eye Cream．
希望可以捱到下個月至買．

千祈唔好炒我魷魚!!

新寵

今天無聊，想寫部落格．
但無從入手．
最後收養一隻新寵物作罷．

曾想收養水母作為部落格寵物，
可惜該網頁一直出現Error，失敗了．

不過Beesy都好得意吖！
個頭圓碌碌，又識住個Cursor轉轉轉．
Click吓佢又會搖搖吓．
仲可以餵佢食竹葉！
可惜左邊太窄，睇唔個More button，你地餵唔到佢囉!

收養自：http://bunnyherolabs.com/adopt/

窩心

很喜歡msn,sms,還有部落格．
那小小的短訊，和這部落格，
給了我一個小天地．
可以和朋友分享一些小事以及我的心情．

高興時，留兩句言．
不快樂時，寫兩句．
許多事，不用明言，
簡單一個字moody又或是加句灰灰的．
很快便陸續會有朋友問候．
感覺很窩心．
精神也回復了點!

謝謝囉！

舒服多了

我從不否認朋輩對我的影響很大．
會因為別人的幾句說話想多了．
慢慢鑽入牛角尖．

但又會因為別人的幾句話又放下了．
這一刻在放下中．
但都已經舒服多了．
繼續努力！奸爸爹！ p(^^)q

秘密垃圾桶

久不久就會有人跟我說一些事．
但說前就會加一句:不過你唔好講比XX知．

本來唔係好清楚人家的工作環境．
但聽得多，慢慢就知道多了．

兩人是同事，相隣而坐．
電話也是共用．
雖然跟的不是同一個老細．
工作範疇也有點分別．

然而你不難感受到，
二人都懚懚覺得對方是競爭對手．
一個會說他工作表現未夠穩定．
冇人敢給他更多工作．
一個說他實際經驗較多，
所以跟的個案也較多，亦較受器重．

雖然工作上與二人從沒交過手．
但從觀察所得，相信二人說的話亦尚算中肯．
一個較有計劃，工作搏殺．
肯學肯做，亦願意加班，
甚至假期也回公司工作．
希望在工作上得到認同．

一個雖然工作表現不及．
但可能因在外國受教育，
與鬼佬上司較咬弦，
奈何因性格關係，
工作始終未能追得上其他人，仍需努力．

大家都互相認識，但係就好似唔清楚我和他們個別的熟絡程度．
兩個人各有各的壓力和煩惱．
隔一排就會同我呻．
究竟我係幾時開始成為了他們的秘密垃圾桶？

越聽越多，有時都怕會唔小心講錯嘢，怕穿煲．
重點係：點解而家啲人咁鍾意半夜三更至同人傾計既呢？

波兒

噚晚睇咗<<崖上的波兒>>．
劇情故事都係一般．
只係日版人魚公主．
不過就誇張啲囉．
條魚會變到比一條船大．
海水又會變成蝌蚪樣既妖怪．
人魚又會變做雞樣咁走去人地屋企．
其實好得人驚！

但係成套動話都係畫出黎，
冇用電腦動話．
誠意可加．
一開始就可以見番宮崎駿既細膩圖畫，
很感動．

另外見到追開既購物狂小說拍咗電影．
二月上，一定要睇！
可惜睇咗trailer，
戲入面既Rebecca 同Luke與我想像中的距離很大．
不過啲衫就一定會好靚囉！

想整理心情，想改變，想放棄．

很高興見到大家有進步，
曾被煙霧圍繞的，霧散了．
曾在陰霾下的，天晴了．
曾遲疑的，也開始向前步進了．

我呢？
還是在那裡．
前進不是，後退不能．
就像是在純粹浪費時間．

我想整理心情，想改變，想放棄．
但．．．．
知易行難．
就當是我的牛年願望吧！

唔識講，唔好講

自問對人真誠，亦不常說謊．
但唔知點解有人想不到點講大話就會向我求救．
可能因為我想到的真的會比別人多．
即係好聽就叫細心，
唔好聽就係小心眼．

亦可能因為咁，
我比較敏感．
人家說一句話，我可能就會想：佢係咪講大話呃我呢？
雖然都唔係啲會死人既大話．
有部份仲可能係善意的謊言．
但係比我知道/察覺咗，始終都會有點唔高興．

老土啲講，我交朋友一向都係用真心．
除非我好唔妥你，
否則當得你係朋友，就唔會敷衍．
所以我都希望得到同樣對待．

所以如果你要講大話，
唔該唔好比我知．
或者至少都講個合理啲既囉!
唔窒，唔問，唔拆穿你，係唔想你落唔到台咋!

雞碎咁多

本來一早預咗入得嚟，頭兩年都冇花紅架啦．
點知今日阿哥話比我知有．
但係個數就．．．．
咪就係雞碎咁多囉！

本來預咗冇，突然又有，係應該高興既．
但係有同事同我講，佢做咗咁耐，
未試過花紅係少過一個月糧架囉．
我今次，係連半個月都冇．

以我個人多心，多嘢諗既性格．
好自然就會諗，得咁少．
係人人都咁少吖，定係得我係咁少呢?
雖然阿哥講過，唔好失望，
其實個個都差唔多，都係得咁少，
不過我知道應該係我最低囉．．．

唯有不斷催眠自己：本身預咗冇，而家係額外既！
賺咗架啦！好阿Q！

之不過．．．
都係嗰句，雞碎咁多，做得啲乜？

好凍呀

今日真係好凍．
凍到我唔願郁．
今朝鬧鐘響時實在唔願郁．
唔係唔願起身，真係郁都唔願郁．
因為一郁個身就會掂到張床既其它地方．
亦即係唔暖既地方．
掙扎良久，至最後一刻至起身．

現在坐在電腦前，
鍵盤上的手指也比平時苯拙得多．
msn的錯字多了，回覆亦慢了．
穿了毛拖鞋的雙腳踏在地上．
只覺寒氣由腳底一路傳上來．
沖完涼很快手腳又變冰冷．

本來今晚得一個人，想唔食飯．
但係天氣太凍，
唔食既話，聽朝起身會超凍．
死死地氣都要食啲嘢．

賤骨頭

呢兩天不用上課，
時間多了，坐在電腦前的時間也長了．
不過唔知做乜好．

不停在自己及他人的部落格遊走．
不停用msn找人談天．
不停用sms和朋友說無聊話．

忙時呻忙．
閒時嫌悶．
真係賤骨頭！

愛自己

人越大，越愛自己．
尤其係當你生活安穩，無乜大風浪時．
因為你唔會知道置身的情況環境幾時會變．
亦因為年紀大了，發覺人生中有太多人，太多事唔到你控制．
所以做人要對自己好啲．

唔想做違背自己意願的事．
雖然係工作上有時唔想做都要做．
否則何來本錢繼續愛自己更多？

亦唔想做傷害他人事．
係我簡單的生活圈子裏，
係冇傷人利己的可能．
況且我不望大富大貴．(雖然我絶對願意中六合彩金多寶)

找個愛自己，自己也愛的人．
可以的話，最好佢愛我多啲．
找不到的話也無仿，
因為我仲有班茂利陪！

一句到尾，
無論做什麼，決定什麼都好．
最緊要自己高興！
自己的生活自己過．
著好啲，食好啲，坃好啲．
花既係自己既時間．
駛既係自己錢．
咁大個人，連父母也管不著．(雖然可能係心淡唔想再管 :p)
除咗自己之外，冇人可以話我(地)！

SK-II Facial

星期日去咗Sogo Club 既SK-II BeautiQue做Facial.
去到先換衫，之後再喝杯茶．
可以揀蘋果，玫瑰或者薑荼．
我揀咗蘋果．
一向對花茶興趣不大，味道一般啦．

之後便入房做Facial．

小姐同我揀咗柔軟滑肌護理．

因為化咗少少妝，要先卸妝．
小姐好有心機咁幫我先用棉花棒慢慢掃．
淨係隻右眼都掃咗幾分鐘．
之後用卸妝油落妝．
然後再用泡泡洗面．
即係一共洗兩次．

過水就用嗰個Frinator電動清潔．
係點既呢?
個Frinator個頭比我既感覺就好似枝安美露個頭咁囉!
濕濕地，但係會震同出水．
應該除咗過水之外仲可以去到死皮，連Peeling都唔駛!

跟手搽爽膚水
然後搽Rebooster
再做香薰噴霧（不過一啲都唔覺有香薰囉！）
網紗增氧護理　<--無印象，唔知有冇做到或者係點

針清呀，普通啦．
梗係唔夠Elaine細心啦．
按摩呀，都係普通啦．
不過我都有瞓著到．
修眉呀，都係ipsa好啲．

下一部係搽神仙水．
佢地唔係用一般美容院既超聲波導入．
係用什麼微電流導入喎．
先用一個大拑，拑上有濕濕地既海棉．
拑係手腕上．
之後用個碌，一路搽，一路碌．

面膜係用SK-II既paper mask．
雖然做facial做paper mask好似唔抵．
但係佢啲mask自己買要七八十蚊一塊，都唔差啦!
做完mask，黎多次神仙水.

仲有冷熱鎚.
先用熱的，作用係先打開毛孔，等其它護膚品更易吸收．
搽埋cream (包括埋眼部)．
再用冷鎚收細毛孔，
做埋肩頸按摩完成啦!

做完後再有一杯茶．
今次我飲薑茶!
都係薑茶好味啲!

個facial因為有Coupon，半價即係$210-
唔叫好好，不過都OK啦，做咗都超過個半鍾喎．
全部用SK-II Products．
做完後皮膚都有番晒光澤，無暗啞．

我買咗course，有八五折，即係大約$357-一次．
佢仲送多兩次比我添!
仲可以比讓比其他人做!
而家做facial咁貴，價錢都可以接受啦!


柔軟滑肌護理．
1.Frinator 雙向式電動清潔
2.爽膚調整
3.Aromist 香薰噴霧
4.網紗增氧護理
5.Vac Spray 清除粉刺／消炎
6.活療水療按摩
7.專業技巧修眉
8.Ions正負極營養導入
9.活細胞修護面膜
10.保濕精華素導入
11.個人眼部及滑肌產品
12.Peltier冷熱按摩器提昇營養滲透
13.頭部及肩膊抒醒按摩

你沒虧欠我

過了這麼久．
我以為我己完全放下．
但一看到那段說話，仍是淚凝於睫．．．

我知道你是愛我的．
我甚至知道你現在仍是．

有時我回想，實在感激．．．
感激你曾對我這樣好．
感激上天賜我一個這麼愛我的人．

我曾講過：我相信我今世也找不到一個像你這麼愛我的人．
我現在仍是這麼想．

但有時兩個人在一起，並不是相愛便可以．
大家來自兩個完全不同的背景．
性格大不相信．
要一起，需要相方的努力，磨合，妥協，遷就．．．
我們都努力過，都想去愛對方，
但我們都做不到．

我和你一樣，
也曾認定對方就是那一位．
也想過一起結婚，生子，共渡餘生．．．

很多時我們都以為自己可以做得更好．
然而現實和想像總有距離．
不是我們想這樣便這樣．

如果大家在一起，
換來的只是一起辛苦，然後為對方心痛，
又何苦呢？

到現在，過去的己過去了．
沒昨日的我，便沒今天的我．
我仍很關心你．
知道你傷心的話，我的心仍會像被揪著般．
但不用跟我道歉，不用給我原因．
因為你沒虧欠我，亦沒欠我解釋

2009

新一年！新開始！
希望２００９年會更好！更開心！更健康！
大家都係！

老爸的新細藝

唔知老爸係咪年紀大，空餘時間唔想再出去玩．
早兩日話搵啲嘢做，突然買咗條銀龍魚返家．
外搭多袋魚仔，加蜈蚣數條（噁）．
話要黎餵魚喎！
(之但係一條銀龍又食得幾多呢?)

買咗返黎，坐係個魚缸前面．
望吓望吓，又幾個鐘．
仲係咁叫我地睇添．
老爸呀．．．
呢啲嘢，我地係三妹早幾年發魚瘟時睇過晒啦．

假期完畢，老爸回大陸工作去．
致電回家時問阿媽佢啲魚同蜈蚣點喎．．．
收線後，姐問媽：咁耐以黎老爸有冇試過打電話回家問佢啲女點呀？
媽：你明知答案就唔好問啦！
姐和我：．．．．．

P.S.條銀龍我今朝起身已經見佢反咗肚啦．
　　 一個禮拜都過唔到呀！陰公！

2008 回顧+ 2009 展望 - 抄襲篇

2008 年,
係好懶的一年.

對工作.
零熱誠.
每日 case 不多,
做得太快同事又唔抵得,
做得快準時放工都唔啱?
展望:
裁員（暫時）唔關我事,
繼續個個月出糧~
（舒特拉的名單唔好有我份）

學習呢?
成日返學冇得 shopping 冇得 gym.
但求合格又過骨~
展望:
快啲讀完,
快啲畢業,
快啲行街!
（讀書同時望可以抽到時間shopping同gym.）

旅行呢..
同新朋友去完高雄+墾丁,
小休幾日义個電.
展望:
土樓!
土樓!
土樓!
（仲有其它：上海．新疆．哈爾濱．
　　　　　　台中．泰國．新加玻．
　　　　　　東京．大阪．北海道．
　　　　　　澳洲．歐洲．加拿大．
　　　　　　全部都想去！）

愛情呀?
努力尋找另一半中.
霧水...
疑似...
展望:
識番啲正常直的有前途有機會的朋友.
其他事容後再談.
（有嘢要諗諗．．．）

做人本來就好簡單,
有得懶,
有得食中醫唔俾食嘅嘢,
有得睇張敬軒演唱會,
有得瞓,
有十兄弟,
夠啦~


註：抄襲自李小姐的部落格，係改咗少少啫：
　　2008 回顧+ 2009 展望 - 林芍芍篇

My Gifts

用了少許時間，清理丟棄舊物．
又找到一些有趣的東西，想和大家分享！

最近朋友戲言送我Precious Moments Figure作為聖誕禮物．
我自己都有啦！
陳年禮物，一直都只係收收埋埋，從來沒放出來．
應該係某年的生日／情人節禮物．


還有多年前嫻姐送我的小禮物，也是Precious Moments．
好似係聖誕禮物．


這是今年收到的生日禮物，麥當當"熊計"．


還有今年的聖誕禮物，出自李小姐手筆．



從沖繩來的手信．有田燒．
成隻碗，我最鍾意個底．




舊時上堂温習時，朋友仔無聊的塗鴉．
呢個係JK畫的，依稀記得抄自蟲蟲特攻隊．

還有無聊的打油詩．


寶物尋歸底，各位兄弟，唔好眨眼．．．．
．
．
．
．
．
．
．
．
Dada.....　師傅寫比我既勁過咭！！！



仲有條碼添架！獨一無二！
我記得係喺科大拉記畫既．
舊日子，很懷念呢．．．


P.S.仲有其它得意無聊嘢，得閒再同大家分享

墾丁．高雄之旅

四天的墾丁．高雄之旅終於結束．
玩得很高興呢！

一共拍了五百多張相片．
淨係整理都需要很多時間．

還未收拾好心情工作．
已在期待下一次呢．．．

恭喜！恭喜！恭喜！

恭喜妳找到疼惜你．
愛護妳．
與妳共度下半生的人．

阿膠

上個星期睇中醫，幾劑藥中加了阿膠．
不用連同其它中醫一起煲，
先下其它藥材，七碗半水煲成一碗，
煲好後再放入阿膠．
融後服用．

碗藥未加阿膠前只是一碗普通中藥．
加咗後立刻成為一碗十級難喝的中藥．
味道很難形容．
腥腥地，騷騷地．
放入口中，要吞下肚並不是易事．
一定要趁熱服，否則其味會令人反胃．
我有一晚飲到最後幾啖，
藥已涼，放入口中，卻吞不下．
仲有點反胃，想吐，結果最後幾口都要倒咗．

前晚有時間，上網查一查阿膠的資料．
阿膠是由驢的皮去毛後熬製而成的膠塊，
醫師比我嗰的就係淺啡色，
一粒粒像砂糖般的結晶．

阿膠雖然補血，但容易令人消化不良．
食咗一個禮拜，我今日至覺得好濟，
而家仲有啲胃痛．
醫師下個星期不在港，駛唔駛趁今個禮拜佢係度睇睇呢?

未出發，先興奮？！

終於頂了package於下個月頭去台灣!
等咗好耐啦!
由最初四個人，變三個人，又再變返而家四個人，
日期再三更改，假期就嚟就去，
現在機票，酒店同民宿都定下來，
講咗，搞咗幾個月終於去得成啦!

一行四人．
其餘三人，二人是舊同事，今年一月都有份一起遊台北．
一人是其中一位的新朋友．
上星期一同吃了個晚飯，
商量一吓機票酒店事直，
言談間笑聲不斷，已為我們的旅程帶來了充滿笑聲的序幕．

但亦有點小擔心，
因為其中一人是新朋友，對他並不熟悉，
不知大家是否志趣相投．
去旅行最忌與話不投機的人一起，
投緣的話當然好，
不投緣的話，少則不盡興，
大則黑面而回，掃興．

終於三字頭....

郊遊好唔好呀?

喂喂喂!兄弟們!
我地又去郊遊好唔好呀?
山頂?淺水灣?定瑜景灣好?

休息日

玩咗成個星期，今日休息一天，抖抖!!

純粹八卦小事一宗

昨夜剛到場不久，見到一位城中富豪伯伯和一位貌美少女到場．
仲坐咗係我地隔離．

初時我並不為意他便是出名身旁美女不斷的富豪．
只是在猜想一個伯伯和美貌妙齡女郎的關係．
經朋友提點才發現！
立時用心留意他們，以便和各位gossip.

二人點了一杯紅酒和一杯白酒(唔知係咪House Red + House White?!)
他們只是靜靜地喝酒，並沒交談．
二人坐了一會便結賬離開．
其間我亦見不到有其他保鏢，跟班或傍友的影踪．

我留意到，伯伯結賬時付現鈔，
找錢時取回所有紙幣，
再從袋中取出一大把銀仔，
大約付了二十元小費．

哈佬喂

今年哈佬喂係星期五，擺明係一個比機會大家去玩的好機會．
六點幾放工，約咗朋友仔食個飯先．
本來飯腳已被同事邀約去火煱，
可能因為放我飛機放得多，覺得唔好意思，
今次放了同事飛機，和我晚飯．:p

上次冇去到住家菜，臨時改咗去客家好棧，換來一肚子氣．
今次去返住家菜食．
叫咗個湯，蘋果雪梨煲排骨，都幾好飲，
好過上次個凍湯多多聲！
仲有叫咗蛋白蟹肉西蘭花，同埋豆腐班腩煲，
兩個餸都唔錯．

吃完晚飯，未夠鍾到下場，於是四圍逛逛，
想給阿娘買個銀包，於是逛了Gucci和Coach，
但係揀唔到啱心水的．
之後到City Super，想看看有沒有應節小道具．
但實在揀唔落手，唯有放棄．

是晚到了Grand Hyatt的JJ's Club消遣．
我們到得早，到達時只有兩個爆炸頭朋友在場．
喝了幾口香檳後一個個才陸續出現．
現場有五人Live Band表演助慶．
亦有人落場跳舞，氣氛尚算不錯．

之後大家決定再轉戰蘭桂坊．
但我今天要上堂，所以先回家．
（其實是年紀大，唔想同人迫）

我一向比較喜歡三五個人一起，
喝兩杯，傾吓計．
如此大鳴大放的玩樂方式，偶一為之尚可．
昨夜場地亦不是太擠擁，一行人亦玩得頗開心！
過時過節，和朋友們開心一吓都ok！

對我來說，小缺點是音響勁大聲，
坐埋一齊對話也要貼耳仔，大聲講，
今天覺得有點喉嚨痛添！

寒入膏肓

小時候家裏常煲涼茶，同埋逢親有咩唔妥都係話熱氣．
今晚跟咗麥同學去睇中醫至知，原來我係一個大寒人！
仲要係至陰至寒嗰隻！

據莫醫師所講，我的所有問題都係出自一個「寒」字．
包括出暗瘡，月經不調，瞓得唔好，皮膚唔好，易癢都係．

我問醫師，同麥同學比，哪個較寒．
醫師話比起麥同學，我．寒．好．多！
我寒到直程係病態！
有排攪！要調理半年喎！

我又問，咁我成日生痱滋，又係點？
佢話唔係熱氣，係陰虛！
於是我又問，咁如果我陰虛，可以點?(即係可以食乜？唔可以食乜？)
佢想一想，答：無辦法，你都係上黎醫啦！

唉．．．
從來沒想過出暗瘡，生痱滋會係因為寒得濟．．．
亦沒想過原來我是一個至陰到寒既大寒人囉！

P.S.剛喝完藥，碗藥唔係苦，係勁難飲！

遊昂坪．大澳

期待已久的大澳之旅終於出發！
先坐坐昂坪３６０．
風景的確不錯，而且今天天氣很好，拍出來照片很清．
最重要的是不太熱和不太曬．

上到昂坪，先後遙遠地和大佛拍了多張照片．
幾個無聊人，又要拓佛，又要拈佛．
仲有人要拮佛同咀佛，真係阿彌陀佛．．．

係無謂的昂玶市集逛一逛，
吃了半碗難吃的章記豆花，
便轉乘巴士到大澳．

其實大澳都係小漁村咁囉．．．
叫做有啲棚屋．
仲有超難吃的車仔麵．
最驚喜的是搭了「噗噗仔」遊覽．
個船家介紹話可以睇到將軍石，棚屋同中華白海豚喎．
都係＄２０，講吓價仲有得平添！
咪諗住出去吹吹風囉，海豚就無咁好彩見到嫁啦．．．

點知真係比我們遇到喎！
隻海豚出現咗幾次．
粉紅色，好靚嫁！
不過最好笑係坐係我後面個男仔原來一次都見唔到．
只好借我們拍的照片看看充數．

遊完大澳，先到屯門三聖買海鮮．
再到朋友仔的屋企煮．
我地身為現代女性，當然唔會入廚房啦！
係由兩位男子代表入廚炮製！
食完海鮮，仲有四餸+白飯．
之後仲有蜜瓜同雪條．

完美的一天！
唯一的少遺憾是不停有人問我：「身為女子，掌廚不及男子，慚愧乎?」

Wii 嘩鬼叫!

因為邀請了李小姐和我兩個朋友一起去做陶瓷，
今天借個機會介紹了他們在電郵中認識．
想不到大家一拍即合，
幾個無聊人在電腦上談了一個上午，
還組成了Wii 嘩鬼叫四人組合，
仲有兩個分支，嘩鬼同嬌娃添！

很高興呢．
期待下個月的陶瓷班．．．

土樓團

昨日講起，四天團到福建看土樓都係$999起．
嫻姐唔信，所以今晚再到永安旅遊網頁查看．
真係$999喎，唔信自己睇吓啦．




Link: 世界文化遺名錄～永定土樓 鼓浪嶼、鷺江、南普陀寺、集美學村、鼇園四天歷史體驗之旅

窮、忙、閒、煩

係Yahoo閱到文章一則,頗感慨,
窮忙族... 好似講緊我地(可能只係我)咁...


窮、忙、閒、煩

【明報專訊】我們從小受教，早起的鳥兒有蟲吃；只要努力工作，人人頭上一片天；老天不會虧待我們……真相往往殘酷，十年寒窗，一紙文憑，換來又窮又忙的生活：每天工作超過十二個小時，薪水扣除租金、交通費用、保險等等之後所剩無幾，這一群是窮忙族（Workingpoor） 。你不屬這一群？還有尼特族（NEET）：不就業、不升學、不進修無所事事的族群（not in employment, education or training）。畢業多年，賦閒在家，始終在工作之間兜兜轉轉，沒有一份工作維持多一年，也沒做過一份有前途的工作，更不要提天職。我們大部分是吃家裏住家裏的單身寄生蟲，我們很閒，也很煩，因為我們不甘心生活是這樣過的，但眼見時鐘的秒針一格一格跳動，卻一事無成。

門倉貴史在新書《窮忙族：新貧階級時代的來臨》介紹以上兩種族群，從十個窮忙族實例，詳細分析這些族群的特徵及日本社會貧富差距嚴重。富裕社會出現之所以窮忙族是因為全球化，產業外移、外判、併購讓一部分白領職員失去薪高穩定的工作，只能做低薪不穩的窮忙族工作。他們當中有三十二歲的時薪人員，看不到十年後的未來，「我只想着自己不喜歡工作，只要能夠有最低限度的收入就好了」；有四、五十歲的中年男人，「只要能每天喝一點小酒、看看喜歡的書，不再感受到僱用的不安，我就很滿足了」，這些和少年時代的雄心壯志相比，是如此卑微。又如此實在。

最新公布，香港失業率為百分之三點二，數字看起來很溫和，但事實上，我們面對的形勢是嚴峻的，金融海嘯的衝擊，失業率預期惡化，所以窮忙族恐怕要繼續又窮又忙，尼特族也要又閒又煩。

文 諾拉

Source: 窮、忙、閒、煩

手工日

終於再黎多次手作仔日．
今次地點唔再係李小姐屋企，係嫻姐屋企．

較早前嫻姐已經做咗布包鈕釦同電話繩，十分精美．
我學吓，抄吓．
最後做咗兩件製成品．

　　　　　　（一）布包鈕釦橡皮筋


　　　　　　（二）雜物電話繩


遺憾一是回家發覺電話繩個扣已經鬆咗，要找個時間修理理．
遺憾二是李小姐答應咗幫我造兩顆布包鈕，最後冇做到囉．．．

? ? ?

最近唔知點解，諗唔到寫乜好．
公司：無嘢值得寫
學習：都係嗰啲
其它：寫乜丫，成日都emails，電話，msn,,,要講都講晒啦！

梁祝

久不久，便會有電影，電視改編，重拍經典故事．
今次係梁祝．

以往芳豔芬顆拍任劍輝的粤劇《梁祝恨史》，
楊彩妮同吳奇隆既電影《梁祝》，
梁小冰加羅志祥小豬既電視劇《少年梁祝》，
仲有蓋鳴暉同謝君豪的舞台劇版《梁祝》，
拍咗咁多次，都係差唔多，故事都係咁．
今次唔同啲既係由讀書改為學武．

最無變既應該係主題曲．
一直以來都係《梁祝小提琴協奏曲》（當然除咗粤劇《梁祝恨史》啦）．
又講真喎，如果轉咗，又真係唔係好似梁祝喎．
就好似《大白鯊》都有特定既theme song咁．

無無聊聊，搵咗少少《梁祝小提琴協奏曲》既資料，
原來作曲既係兩個學生咋！
仲要係改自越劇！
又知道多樣嘢．

♪　♪　♪　♪　♪　♪　♪　♪　♪　♪　♪　♪　♪　♪　♪　♪　♪　♪
　 　《梁祝小提琴協奏曲》是何占豪、陳鋼於1958年完成的作品，
　　　當時兩人還是上海音樂學院的學生。
　　　他們以越劇《梁山伯與祝英台》的旋律為基礎，
　　　創作出這首日後風靡華人界的管弦樂曲。
　　　1959年，於上海南京大戲院首演，
並由兩人的同學俞麗拿擔任小提琴獨奏的部分。

Source: 《梁祝小提琴協奏曲》

我．愈來愈串

自從上年轉了新工後，唔知係咪因為學咗啲阿哥，我發覺我愈來愈串．


例子一：
有Sales自己唔做嘢．
唔緊要，但係佢阻住我做嘢．
都唔緊要，仲要同人地講話我hold住個快勞．
我唯有覆依貓，話比人知事實的真相．
轉頭個Sales咪做番佢要做既嘢囉，等我可以做嘢囉！

例子二：
有個Sales同我講，話比咗文件我，
好聲好氣覆佢貓，同佢講我冇收過，
佢竟然覆貓話阿乜水比咗我，仲要cc埋比我啲老細．．．
即係逼我做嘢啫．
最後比我係倉到提番個快勞出黎，發覺夾咗係入面，仲要係比其它唔關事既文件遮實晒．
我唯有又覆貓話佢知，仲要加兩句話文件夾係快勞入面，易唔見，
為防止delay同遺失文件，唔該下次直接交比我．
最後我阿姐睇完貓，都加多兩句話佢添!

例子三：
呢個係最新今日發生既，亦係我認為最串既．
無啦啦，有個sales貓我，叫我比啲資料佢喎．
我又唔係佢助手，隻case又唔係我既，仲乜叫我？
其他Sales從來都冇要求過，點解係佢要?
有嘢唔清楚，應該直接問個客啦！
本部門冇呢個服務嫁！
本來諗住唔理佢就算，點知佢又同人講話隻case hold住，因為要等我覆喎．
我只好貓佢，好簡單咁寫咗兩句：
What's the purpose? Other sales haven't requested such information before.

其實都唔係好串啫，係佢地迫我嫁!

Make a wish...

不知從何時開始，為著什麼原因，我們什麼時候都要許願．
見到流星．
聖誕節．
除夕．
生日．

是太多心願未了?
是我們太貪心?
還是因為不如意事實在太多?

從幾年前起，我的生日願望便是希望我和家人及身邊的朋友都健健康康，快快樂樂．
但今年似乎願望沒實現．
而且往往在我感到快樂的時候便會發生令人沮喪的事．

看著他們難過，卻又幫不上忙，
感覺很難受．．．

還有個多月便過生日，我今年的生日願望也會一樣．
希望來年可以願望成真．

永定土樓

姐姐話佢重陽節會去永定睇土樓，我都好想去！

金融海嘯

呢幾日兄弟間靜寂無聲，金融界則風聲鶴唳．
話說繼投資銀行之後，另一所美國巨大的金融集團亦面臨倒閉危機．

以前就唔多熟呢間公司，但係上年係舊公司，老細玩嘢時「質」比我做既其中一份工作，就係幫手分析佢旗下一間保險公司的信貸情況，加上過去一年有兩個朋友仔先後跳槽至同一集團下的公司，所以對佢知多咗少少．

星期一晚其中一位人兄同我講話佢可能會失業，因為我冇睇報紙，仲以為佢講笑；到星期二返工睇新聞至知原來佢如果係４８小時內籌唔到８００億美金就會倒閉，先知原來真係咁大件事！

消息傳出後，人人自危．

員工驚失業，紛紛問有冇好介紹．

銀行金融同業則即刻劃清界線，做開生意的，唔再參佢玩．
由佢地既保單所作的抵押品亦立即如同廢紙，個客用緊既信貸融資額度亦要立即喊停．
雖然話保險公司資產分開獨立，但係連大銀行，咁熟悉金融體制的機構都唔信佢，一般小市民會唔會信呢？

做顧客的擔心血汗錢會化為烏有，一窩蜂話要攞錢走．
仲有仲有．．．．
公眾地方，唔方便講咁多，有機會再私底下講大家知．

一直以為咁大間公司，加上各項嚴謹的金融／保險規管，係無可能會出事既，但原來大家睇到既，都只係得個樣，就算佢信貸評級有幾好，一樣可以一夜間渣都冇．

我諗敝行仲科到７０億美金出黎比阿公，應該唔會有事啩．．．

靜英英

呢幾日個mailbox好靜，冇得chat....
快啲人齊啦！

Miss you all!!

Too many of u are not in HK.
Just want to let u know I miss u all!!

孔明燈

今年中秋，幾個兄弟都不在港，本來以為都應該冇嘢做，要係屋企發霉．
點知下晝兩點零，知道有朋友晚上會去放孔明燈，即刻又話要去啦．

晚上十點，粉嶺火車站集合，人齊後便打的到上禾坑村．
係村口落車，入到村內一間古舊的建築物，係村內的舊書塾「鏡蓉書院」，亦係法定古蹟，入面已經有師傅在製作中．

想不到他們做的孔明燈比兩個人咁還高．
糊紙時須佔用書院的整個大廳，幾個人去塗漿糊，舖紙．

整個廳內站滿了圍觀的人，要看得清楚真的不易．
「裝」了一陣，便四維走吓望吓，話晒都係法定古蹟嘛！
屋入面又焗又多人，個個都汗流浹背，有朋友仔仲熱都臉都紅晒．

好彩師傅們一晚會整好幾隻，最後都找到好位置觀看整個過程，仲影到相添！

孔明燈整好後，當然要寫上願望啦！
鬼咁多人，真係要迫埋去至寫到．
不過我最後緊係成功啦！仲要返兜寫多幾個添！
寫好願望後，成班人浩浩蕩蕩去村口放孔明燈啦．

要放燈，便要先充氣．
原理就和熱氣球一樣，要係氣球內充滿熱空氣．
由於熱空氣比冷空氣輕，便會有一種上升的力量．
到儲夠力量之後便可以升起，仲升得好快添！
本來朋友想在燈前拍照，但係師傅一放手，燈便飛走了．
我立即按掣，都只係影到兩個人加隻燈尾．
真係拜拜你條尾．．．

未試過都幾好玩，不過係遠啲同熱啲囉．

饞

我們一家都嘴饞，尤其是對小吃零嘴，更是停不了口．
連小妹的幾隻兔仔都係．

我未見過如此嘴饞的兔仔．
寵物零食，各樣蔬菜，最鍾意係食橙．
聽講佢地一見到有橙食，開心到可以跳到成尺高！
不過我仲未見過．

一晚，姐姐在家，我們一起吃了幾件Jenny's Bakery的鳳梨卷．
姐姐隨手便拿起了桌上的膠盒，打開，攞咗粒豆放入口．
我忍不住，大笑！
阿娘比較有良心，小聲說：這是給兔兔吃的．．．
姐姐立即吐都吐唔切，好彩未嚼碎．

到夜啲，我攞咗啲豆豆餵兔仔妹妹．
仲記得叫佢問姐姐係咪好好味，因為姐姐都嚐過！
即係被姐姐追打呢！
咁好笑的事，點可以唔同大家分享！

客家好棧

今晚去了久違的客家好棧吃晚飯．

兩個人，唔吃得多．
叫咗兩客唔知什麼什麼烏雞湯，等咗好耐，但係黎到一啲都唔熱，只可叫做微溫．
飲咗幾啖，放棄．

一個花膠雜菜煲，一啲都唔出色，唯一ok只可以話佢啲菜唔太老，同埋唔係好多味精．

差不多食完個雜菜煲，碟蒸雞至到．
又係唔多特別，仲要成碟都冇乜肉食，大部份都係雞翼．
食蒸雞最憎食雞翼，又冇乜肉，又要食埋雞皮，淨咗半碟．

到埋單，合計$153，小姐話今晚部機壞咗，唔收AE咭 ，唯有簽第二張．
簽單時，個小姐眼利見到收銀碌咭淨係碌咗$135，要等佢返轉頭改．
點知返轉頭竟然冇改到張單，問我地可唔可以比$18現金佢囉！
自己做錯都懶改？我咪叫佢攞張咭去碌多$18囉！
佢轉頭咪死死氣地void咗張舊單，再碌過一張．

以後唔好再去！

成晚最好既係之後出去食既桑寄生蓮子茶囉！

長週末

今個星期日係中秋，連埋星期一補假，一共三天假期．

最近同事們密密放假，搞到我都心思思．
決定請埋星期五，一連放四天．
冇嘢做都要放，最多係屋企hea！

升職都唔開心?!

公務員上年升咗職，仲有一個月confirm（即係好似我地過試用期咁），下個月就跳point(即係有人工加)．

但係佢話唔知點解覺得唔係好開心，只係覺得時間係咁過．．．
明明知道自己有努力，有進步，
但係到頭來好似乜都冇．．．
睇就真係好好，但係自己就覺得一無所有． (好灰)

佢仲話諗過就算比佢仲咗明晚既中秋金多寶($4,500萬)，
生活都唔會有啲點變，淨係個質素高左．．．(仲想點呀?!)

因乜事明明係值得高興既事都要用咁消極既想法去看待呢？
係乜嘢會令一個人咁灰呢?

係因為成件事根本唔值得高興?

定係其實呢啲唔係佢想要既嘢?
但係冇人會唔想要升職加薪啩？

還是係有其他事煩緊?
我唔敢問．

外遊

最近好多朋友都先後外遊．
有去北京的．
有去台灣的．
有去日本的．
連小妹都會去英國．

我幾時至有得去呀？
唔駛去好遠好耐．
近近地，三幾日都好丫！
很懷念在台灣hea吓，行吓，同幾個朋友仔笑吓，玩吓的時光．

悠悠閒閒

這幾天都幾得閒，係公司一點也不忙．
明明今個星期到我放錢．
但係今日等咗成日都淨係得嗰兩單．
平時一日閒閒地都有十幾單啦！
最衰阿姐放完假返咗嚟，否則蜜月期延續下去的話．真的不錯．

收拾

我房地上的一幢筆記，桌上的筆記書本，多得慘不忍暏．
今天無聊在家，終於「的」起心肝，收拾一下房間．

原來只打算整理筆記，誰知最後作了一項偉大工程！
除了今年剛用完的法律筆記外，還清理了一些金融筆記和書．

最後，我丟了四本舊書，一整呎高的筆記和廢紙，數袋垃圾，還有一台陳年舊mini hifi．
幾個小時後，終於被我理出一小片淨土來！
多年不見天日的窗台終於有平面再次出現！
很高興呢！

但用了一個下午，都只收拾了房間的一小隅．
我仲有電腦枱，衣櫃同大量衣物未整理．
究竟要幾耐至可以攪掂成間房呢？
明明我間房好細之嘛．
到我執得完，個窗台應該又亂返．

不過在收拾的過程中，我還找到了一些很有趣的東西，比如一些陳年舊照．
我找到了同學們中學時期的學生照，係要嚟貼學生證嗰隻！
咁都唔奇，最奇既係當中竟然有某同學的舊男友！！
張相我望咗好耐至記得相中人是誰．
點解我會有既呢？
我已經唔記得咗．有冇人記得？
或者遲啲可以攞出嚟大家一齊分享吓．．．

再放假！再放假！再放假！

有人同我講，話聽日仲會八號．
我都想，放多半日假，仲可以瞓晏啲！
雖然似係痴人說夢，但係恨吓都好丫．．．

放假，放假，放假！

好彩最後都今日都唔駛返工．
又多日假，hurray!!!
可惜明天係長週，冇long weekend．

鸚鵡

點解？點解唔碌快少少呢？
我今日已經完全陶醉於holiday mood當中，無心工作．
但係點解我返到屋企，就有人話我知聽日上晝要返工？

其實你可唔可以行快少少，只要係八點前掛八號，一直支持到十二點後至落就得架啦！

與姐的對話

我家有四姐弟，本人排行第二，對上有個姐姐，下面兩個，一個妹妹及么弟．
大家感情尚算不俗，所以姐弟間亦會常常一起幹無聊事（例如會大家在同一間屋中，都不會面對面談話，而用msn）．

昨晚姐姐特然和阿娘說她唔知幾時拗了柴．
最攪笑既係，佢話瞓醒就係咁．
瞓著咗點拗柴呀?


節錄今晚和姐姐的一節無聊對話如下，姐想屈我累佢拗柴：

姐：咩呀，可能就係你發夢的時候推我，我先會整到架！
我：實係啦．你瘦唔到都係因為發夢時我質你食嘢咋！

姐：唔怪得之啦！我都奇怪架啦！有咩理由至得架！
我：仲有呀，你生得咁矮都係因為你發育時我晚晚去打你頭頂，你至長唔高咋！

姐：我今晚就話比呀嫲知，等佢黎話你！
我：阿嫲不知幾開心呀，你而家咁似佢，如果唔係你好似我咁，又高又瘦，佢就唔高興啦！

姐：你慳d啦你，你咪以為比我高/瘦，就係真係又高又瘦至得架！
我：咁係阿嫲眼中，我係丫麻．
姐：你再講，阿嫲今晚就會話你知佢唔係架啦．
我：我唔講囉，等阿嫲唔話我知，話你知!

姐：哦，咁唔駛阿嫲話我知，我都知你唔係又高又瘦啦．
我：唔係喎，我驚唔係阿嫲親口話你知，你會心有不甘，始終都會有條刺喎！
姐：我而家思疑有條刺個個係你喎，我怕你接受唔到，唔肯承認，自己扼自己就唔好啦都係叫阿嫲行一轉，今晚親口話你知啦．

我：放心啦，我點會有刺係個心度喎，事實係點，我同你一齊企係鏡前照照就即刻知啦．．．　我冇咁做，都係驚你接受唔到咋．
姐：又黎啦，又黎啦，仲唔認你接受唔到，你再係咁，阿嫲一陣間等唔切你瞓著，就行入你房架啦！
我：唔會啦，佢咁錫你，佢係都飄咗入你房先啦．
姐：hey，我呢d時時都掛住佢的，阿嫲就係我心中，唔駛時時見的．
我：你實係啦！不過阿嫲掛住你嘛！

姐：其實我諗諗下，我隻腳有可能係我坐到扭到．我好鐘意放隻腳係張凳度．
我：係囉，自我檢討吓咪好囉，唔好成日賴人至得假！


其實真係絕頂無聊，有無朋友屋企都係咁既呢?

白痴仔

近排唔知做乜，成日都做白痴事．
繼上次去做瑜珈，有帶褲，冇帶衫後，又做了一件白痴事．

事緣今晚同幾個同學仔食飯．
一人叫一個甜品．
我想試吓同學仔個Tiramisu ＋雪糕．
但係因為我隻匙羮用過，所以隨手拎起佢個雪糕上面隻啡色羮．
拎起咗至發覺原來隻羮係朱古力，即時全枱四人(包括我自己)大笑咗五分鐘．
隨後的時間亦不繼被人恥笑．

點解我會咁嫁?
唔同比某傻仔傳染咗?

走鋼索

走在鋼索上面的人，搖搖欲墜，驚險萬分．
明知危險，卻仍不願離開．
旁觀者看在眼裏，只有焦急的份兒．

在道德上的層面上，我們都很寬鬆．
很想說只要高興、快樂就好．
但我怕我說錯了話，變相令你沉淪下去．
令你越走越高，越行越遠．
直到回不了頭，摔個焦頭爛額，再一次受傷．


♪　♪　♪　♪　♪　♪　♪　♪　♪　♪　♪　♪　♪　♪　♪　♪　♪　♪

《遙吻》

作曲：常石磊
填詞：林夕
編曲：C.Y. Kon

慢慢 雪落有聲
情境 就似這段情 冷卻得結冰
漸漸 腳步放輕
驟聽 彷似你念及餘情

但願 我沒眼睛
無須 面對這道牆 有你的背影
但願 我沒法醒
令我 不覺你道別 沒震驚

＊明知得到你　都要知道怎放下你
　明知天空有很多班客機
　令我不得不放棄

　如果有限期　可否拖得到我會飛
　容我 俯瞰你
　遙吻 比怨你可悲

　如果有限期 可以拋低你
　我會一生也學習 忘記你＊

事實 你定要走
回家 是你的自由 我只得放手
異地 雪在顫抖
大概 只有極地 是永久

Repeat ＊

何需怕距離　千里都可以吻你

♪　♪　♪　♪　♪　♪　♪　♪　♪　♪　♪　♪　♪　♪　♪　♪　♪　♪

好遲，好冇誠意既道歉

發覺原來我成日都被放鴿子．

今晚有個無聊人msn我，同我道歉．
又話請食飯，因為佢失過約．

但係有誠意既道歉唔係應該一早講架咩？
點解要過咗成個幾月至講？

雖然我份人無乜所謂，同你再做返朋友都ok，
但係餐飯你可以慳返．

朋友都分好多種，有深交，有知己，亦有啲只係點頭至交．

同學仔一個，無需要咁熟．

黑仔搭的士

今日因為趕時間，所以揀咗搭的士去觀塘．

架車去到觀塘，轉彎時同一架小巴爭路，輕輕撞咗一吓．
好彩當時車速唔快，我又有戴安全帶，冇事．
一撞，即刻叫個司機比我落車走先．
大佬，我趕時間至搭的士，我唔會係度等你地傾掂數至走囉．

好彩今日套戲好好睇．同埋晚餐都唔錯，心情至好返啲！

放鴿子

同一個人已經唔係第一次放鴿子．

我好憎人應承咗又唔出現，仲要係喺最後一刻，用一啲最假既理由，同用最無誠意既方法去通知你．
今次既理由係細路明天生日，所以今晚要同佢食飯．．．極爛．．．
究竟係今日至知細路明天生日，定係喺最後一刻至決定食飯，所以要約佢八點，七點幾至sms通知大家呢?

唔想黎或者唔得閒黎可以直接講，唔會有人迫你，點解要咁呢?
有冇諗過其實咁樣係會影響到其他人嫁?
小則掃興，大則人地既活動要被迫取消．
早啲話唔黎，起碼我可以有其他計劃嘛．

你自己都成日鬧呢啲人啦！點解自己都要咁做呢?

我們都是無聊的

無啦啦打風，無啦啦多日假期，好高興．

但係一整天在家做乜好？
冇嘢做，冇節目．
偏偏今個風又要傍晚至會落，早少少的話都可能會出街玩玩．
宜家要係屋企發霉同種菇．

例牌開著電腦上網，從未見過會這麼人齊的．
平時都係得十幾人，而家足足一倍．

得到一天突如其來的假期，又冇得出街，大家都好無聊．

好悶 ...

好悶．．．
好悶．．．
好悶．．．
好悶．．．
好悶．．．
好悶．．．
好悶．．．

久不久，定期都要嗌一嗌好悶．
日日都淨係返工，放工（我好唔鐘意做既嘢！）．
唔想返工，淨係想玩，想旅行，想 hea，同埋唔駛做．
幾時至得?

失而復得 ---- 失去了的、放棄了的、不是你的

遺失了多時的手錶，竟然可以找回。

那只錶很輕，戴在手上，一點也感覺不到它的重量；錶面很小，常被我戲謔為「自私錶」，只有自己才可以看到時間。

初初不見了的時候，到處的找：桌上，桌下，衫袋，褲袋，各個手袋，找了很久，就是找不到。很是心痛，甚至忍不住打了一通電話給送錶人，告訴他那只錶不見了。

其實那只錶己經是舊舊的了，錶面缺了一角，銀色錶帶花了，連著的銀鍊也爛了多時，早被我拆下。

現在找回了，也沒特別高興，反正現在已習慣不戴手錶；在家有鐘，在公司有電腦，在街上我用手機也一樣可以知道時間；時間、日子一樣的過，甚至過得更好、更輕鬆、更快樂，重要的是習慣了便好。

人就是這樣，失去的時候拾不得、放不下；讓你找到了、得到了，又覺得不外如是；沒有便沒有吧，習慣了，便沒什麼大不了。

花時間想著那已失去了的、放棄了的、不是你的，只是浪費時間。我們都不是那種人，所以大家都不要再花時間去想了......

♪　♪　♪　♪　♪　♪　♪　♪　♪　♪　♪　♪　♪　♪　♪　♪　♪　♪

郭靜　《離開》

作詞：王雅君　作曲：王雅君　編曲：呂紹淳　　

Oh　淚水　是一種防備
是厭倦在你心裡的負累　
我不想再去追　再追只是掉眼淚　
心還有感覺　就該給自己機會

＊Oh　孤單　是一種純粹　　
是愛退去後再沒有所謂　
我能夠學得會　學會一個人面對　
愛不能是誰　應該綁住的絕對＊

＃離開後才能勇敢追　追尋心中另一個世界　
　我不要完美　只要能再回到原位＃

△我只要找到另一個感覺　相信明天一定有誰　
　能給我安慰　原來就在我　周圍△

Repeat ＊,＃,△,＃,△

能給我安慰　原來就在我　周圍

♪　♪　♪　♪　♪　♪　♪　♪　♪　♪　♪　♪　♪　♪　♪　♪　♪　♪

星期六

星期六一個人在家，幹什麼好？

發呆，看書，聽歌，上網，找朋友聊天，看別人的部落格，更新自己的部落格，發白日夢，想想上街逛好還是呆在家好，睡懶覺，計劃一下星期天做什麼好，吃雪糕，敷個面膜，更新電話鈴聲，看DVD，看電視．．．．

又過一天，勁無聊！

米白色／灰鞋

昨天等巴士的時候，百無聊賴，看到腳上的鞋子；
本來漂漂亮亮的米白色喱士，已矇上了一層灰，鞋頭的白膠還劃了幾行灰色；
變得不新不舊，尷尷尬尬的．
有點不高興．

P.S.本來拍了照的，但按錯掣，刪除了．

突然想說句"謝謝"

快樂的時候，我會和朋友分享．
說了一遍又一遍，只要還有誰不知道，都要告訴他．
朋友們會替我高興，恭喜我．

不快樂的時候，我寧願所有都是自己的．
只想一個人，靜靜的．．．

直到受不了，才會找朋友；不為傾訴，只為沾一沾別人的快樂和開朗氣息，從牛角尖中走出來一點．

興幸我有數位這樣的朋友．

認識了多年的好朋友：雖然我不多向你們訴說，但我想我不快樂的時候，你們多少也會知道的．只是一兩句簡單的問候，已令我覺得暖暖的．．．

相識不太久的朋友：知道我不快樂，也會多找找我，吃吃飯，談談無聊事，令我心情好轉一點點．

沒什麼，只是突然想和大家說聲"謝謝"．

Tele-Conference

因為公司大，部份工序不在香港進行，部份要去新加坡，部份要去吉隆坡，連出錢都要環遊世界之後至入到香港戶口．

亦因為公司咁大，少不免有時要開Tele-Conference，各個城市的代表透過電話開會，Briefing．

今日就試咗第一次，用互聯網傳送的聲音很清晰，清楚得可以聽到世界各地在電話旁的人各樣唔關事對話，明明講咗好多次，叫不發言的人要Mute咗個電話，都仲可以聽到各地方言，雜音；仲有人開開吓會可以將個電話OnHold，放音樂比全世界的人聽；又有人唔知係個電話度攪乜鬼，整啲刺耳的回音出來．可唔可以專業啲呀？做緊嘢嫁！

Meeting Room的冷氣強勁，仲要開成兩個鐘頭咁耐，勁難頂！開完會出黎，吹到頭都痛．

不過我覺得喺NY的人仲慘，我地開下晝5-7，即係佢地既朝早5-7，晨早就要返工．明早香港時間九點仲有一場，做Project Leader真係唔簡單！

我的心太軟

一直想再做大家最愛的朱古力心太軟蛋糕．

昨天終於做了，粉漿做好，倒進焗杯，再放入雪櫃雪凍．

先預熱焗爐，焗了不用十分鐘便已有陣陣朱古力香氣飄於室內．前後只須焗十多分鐘便成．出爐後，加一杓雲呢嗱味的雪糕在旁．外觀已經十分吸引．

用匙從中一分，深啡色的香濃古朱力漿從中流出，還飄著熱煙，和著冰凍的雪糕於入口中，正！

真的很想和大家分享．．．

找個機會吧！

Urban Emotions

每天到到唱片店逛個圈，為的就是它！等到頸都長，終於等到啦！


今次隻新碟有十四隻歌，其中＜他的故事＞，＜櫻花樹下＞，＜雪花抄＞同＜吻得太逼真＞已經聽過，老實說，這幾首個人都覺得一般．

反而有隻非主打歌不錯，值得細味一吓．





除咗新大碟外，今天終於欣賞完演唱會DVD，雖然只是DVD，但仍然睇得好興奮，只係身旁少了尖叫聲．$168.- 3DVD，超值！

出一身汗

今天又是運動日，銅鑼灣的Physical氣溫暖暖的，不像喜來登那間，泠氣強勁，郁極都冇汗出．

以前最討厭便是出汗，氣溫高一點便不想動，只想留在有冷氣的空間．
現在發覺郁一郁，出一出汗的感覺不錯，覺得要咁至似做運動．
希望不是三分鐘熱度．

但現在仍只可以接受運動出汗，不運動時最好都係唔駛出汗，行行商場最啱我．
仲有現在仍然唔鍾意同陽光玩遊戲，今時唔同往日，要好好保護皮膚．
須知道紫外線會加促皮膚衰老，仲會曬黑同起雀斑，要快啲買番吧防UV太陽傘至得！

我拍拖呀！

上星期同幾位兄弟吃晚飯，期間一位朋友來電，說了兩句．
電話講完後，兄弟甲用一付股起勇氣的樣子問：你係咪拍拖？
好自然，反射作用般，我立即答：唔係，點解你咁問?
（即時評論員兄弟乙即時評道：答得好快，好肯定！）

兄弟甲堅持再問：有人話你拍拖喎！
堅持回答：冇喎！邊個講嫁?
甲：有人囉，嗰個人同你好熟嫁喎．
堅持追問：但係真係無喎，不過我好想知係邊個講既．（一定要抓出兇手）

甲：係E講嫁．
問：點解佢會咁講嫁？
甲：冇呀，佢覺得你似囉！
　　我已經話唔會啦，冇可能拍拖我地會唔知囉，同埋個個啲時間唔係返工就係
　　同我地一齊．
為了洗脫嫌疑即時回應：對對對！平時工作時間咁長，大家又見得咁密，唔會唔知囉，同埋我一定會同大家講既！
兄弟丙和應道：係啦！無可能唔知啦！我地每星期最少見一次，無理由會唔知！
再回應：咁我最近係多個同其他朋友出去玩既，不過冇拍拖囉！

對不起，各位兄弟，要各位廢心了！亦謝謝各同學對本人的信任和了解！
同時很抱歉令大家失望了，因為．．．
我真的沒拍拖．．．呵呵呵．．．
有的話再告訴你們吧！
有什麼問題歡迎各位直接問我！
多謝！！

久違了，Physical！

自從上年開始返學後，便放棄了一個星期一次的 Physical 運動日．

上個星期終於又再 join 返，其實如果好彩的話，考試合格，我九月便又要再投入週末上學日，但是現在的日子實在太無聊啦，唔做運動就一定會去咗行街；雖然去咗做Gym都會行，但係一定會行少啲．

況且大家都認為今時唔同往日，不得不承認歲月不留人，雖不至於年紀大，機器壞，但身體機能的確比不上幾年前了，一定要Keep Keep至得，唔想到將來太遲才後悔．

昨天去跑了十分鐘，再上了一堂Yoga；太耐沒運動，今次動一動，感覺很好；出了一身汗後，再去許留山吃了一個冰凍甜品，正！！

期待下一次的運動日．

P.S.張城城真係應該要去郁吓，唔好再搵其它借口啦，要記住你年紀係最大嫁！