慳

近排興慳家.
繼利用網購省下(駛了)一大筆後，
最近另一慳錢方法就係善用各種優惠．

包括係用免費報紙上的$1，$2 coupon買包做早餐．
原本一個$6包變$5．
加舊街場三合一咖啡，大約$2-$3包．

我試過買一條紅豆綠茶包(用coupon後$11)，
分咗兩日早餐 + 一個午餐咁食，
另加兩個早餐內的舊街場三合一咖啡，
三餐加埋約$17，仲平過以以往飲開公司樓下西餐廳的一杯外賣咖啡．
($18一杯，過年後加到$24!!)
(OK,我認之前我個早餐可能真係奢侈咗啲!)

午餐有飯帶就帶，
無的話主要選擇都係:
1.面包
2.麥當當(通常我食$8麥香雞包+$6紅豆/香芋批)
2.糖朝飯盒外賣($28有埋糖水係尖沙咀真係好扺)
4.買兩盒$4豆漿沖麥皮
以前會過隔離商場買$20車仔面，2012年起加價到$24已經冇幫襯了．
樓下大家樂裝修完後加咗價，亦冇再去過．
(實情係發現佢條外賣快線既一個麻婆豆腐飯要收貴$3條氣唔順)．

最重要最重要係護膚品，可以慳買唔可以慳用．
所以要拎sample，方法都有幾種．
可以上網搵coupon．
又可以係報紙雜誌搵．
做member又時不時有得拎．
仲有各大信用咭都會寄張咭比你試．
勤力的話，一個星期己經可以好好收穫．
我估計，今年之內唔駛比錢買精華素既機會好大!

大功告成

終於將最後一粒Fluoxetine都食埋．
大功告成!
可以慳返啲啦!

網球肘

手痛，膝痛，
以為係天氣凍，引發之前摔倒的後遺症．
所以今日去咗睇跌打．
點知師傅話我隻手有啲網球肘．
有事的係前臂近手踭位置，
同埋手掌近手腕位．

一黎就話要針．
針前師傅問我食咗嘢未．
原來空肚針好容易會暈喎．
好彩都係食咗嘢先去啫．
一共落咗十二針．
有啲拮落去時都幾痛．
爭啲流眼淚．

落晒針，師傅又問我平時易唔易暈．
我答我血壓低，常踎低起身見頭暈．
師傅聽完就話咁就齋針唔電啦．

針咗十五分鐘．
起咗針．
師傅同我按摩，拉了幾下．
再敷冷藥，敷八個鐘．
拆藥後要等一個鐘至可以濕水，
否則好容易有風濕．

至於膝痛師傅睇都唔睇就話唔關事．
只係個人太虛，所以會膝痛．
乜都冇做過．

Mood Disorder

睇咗幾個月醫生，
為方便claim保險，
醫生紙上寫的診斷一直是胃病．
而家個胃冇事啦，
所以唔可以再寫胃病，
我叫姑娘講照寫啦，
試吓claim唔claim到先．

因此亦所以終於知道我的病原來即係Mood Disorder．
即係情緒病．
原來情緒病有七種：
1. 經常焦慮症
2. 社交焦慮症
3. 創傷後情緒病
4. 驚恐症
5. 強迫症
6. 抑鬱症
7. 鬱躁症

醫生冇同我講我係邊種．
上網做咗啲測試，
我諗我係抑鬱症，
不過係輕微嗰隻囉!

資料話治療要六個月至一年，
但係我好輕微咋喎，
至少我冇諗自殺丫!
如果保險冇得claim既話，
我一定唔會睇咁耐!
最多睇多一兩個月算數!

加咗藥

因為最近睡眠質素又開始下降，
醫生話我應該係血清素唔夠，
所以上星期加多咗隻藥比我．
係10mg Flouxetine．
上網查了一下．
它的副作用有點怪，
又會失眠、又會困倦、又會疲勞，
咁食咗究竟係幫助定阻礙睡眠呢?
不過除咗困倦、疲勞之外，
其它既副作用我暫時唔覺有，
包括我最想要既體重下降．．．


資料來源：香港醫院藥劑師學會 - 藥物教育資源中心

學名:
Fluoxetine HCl (鹽酸氟西汀)

孕婦用藥分級: C

藥理:
抑制中樞神經系統中的血清素回收，令系統中的血清素含量相對提高。

用途:
抑鬱症，強迫症，驚恐症，經前不悅症(Premenstrual dysphoric disorder)

劑量:
每日一次，每次10-20毫克，然後按照情況調整，每天最多80毫克

用藥禁忌:
對此藥過敏的人，不可與MAOI同服

用藥注意:
1. 有發生狂躁或輕躁症的可能
2. 對操作危險機械的病人應予以警告
3. 妊娠、授乳期婦女慎用
4.　不宜用於兒童

常見副作用:
頭痛、焦慮、緊張、失眠、困倦、疲勞

其他副作用:
耳鳴、消化不良、嘔吐、心律失常、便秘、體重下降

藥物相互作用:
1. 勿與MAOI合用，也不應在MAOI停藥14天內使用
2.　可增加其它抗抑鬱藥的血藥水平
3.　此藥可降低Thioridazine, mesoridazine的代謝並引發致命的心律不正
4.　CYP2C8/9的抑制劑如Fluconzaole, gemfibrozil, sulfonamides等可加強此藥的療效及毒性
5.　如與鋰劑同服可增加鋰劑的毒性及血液中的濃度
6.　如與華法令warfarin同服亦會增加副作用

病患者及家屬注意事項:
1.　此藥可引起失眠，如遇此情況，可於早上服用。
2.　病人服後或會出皮疹或蕁麻疹，如遇此情形立即停服，並通知醫生

醫管局藥物分類: 通用藥物

藥物法例分類: P1S1S3（此藥為醫生處方藥物，須由藥劑師核實處方後配藥）

磨沙玻璃

本來是私人的事，
現在好像變得太多人知了．
好像少了點私隱．

有些人我不介意他們知．
所以我會主動告訴他們．
但有些人我本人真的不熟悉他們．
雖然我身邊的人可與他們很熟，
又雖然他們不是徹頭徹尾的清楚．
但感覺就像在赤身在磨沙玻璃中．
明知別人看不清楚，
但就是感到不自在．

要保留多點私隱，
可能真的要自己先講少一點才行．

藥

昨夜兩點多，累得眼睛張不開．
忘記了吃藥．
結果整晚就是睡不熟．
今天真的真的好眼瞓．

吃了一個多月的藥．
發現牽動我情緒的是身邊的人與事．
吃了藥，唔覺人會開心啲．
亦知道呢啲藥唔長期食始終唔係咁好．
但係喺睡眠質素可以大為改善的條件下，
我暫時未打算／未可以停藥．

好戲

發覺演技越來越精．
說謊做戲真的可以不眨眼．
明明知道扮唔知道，仲要可以叫得出"係咩?!"
明明係扮唔係，加埋一臉無辜．
我覺得我可以攞獎囉!

治療（番外篇）

又係無無聊聊，
攞咗啲藥比游同學過目．
意見係：呢啲藥都係唔好食咁多!

之但係我記得有個blogger都講過：
When you are just one pill away from a good sleep, how could you resist the temptation?

治療（二）

除咗藥物治療，仲有行為治療，分三樣．
首先，每晚要快步走十五分鐘．
係要快步走，唔係跑．
行到有少少氣喘就啱啦．
醫生話咁先係帶氧運動，
咁至有用喎．

然後每朝起身要做原地踏步．
起初每朝一分鐘就夠．
慢慢再加長時間．

還有呢，得閒食晏有時間就要去公園行下，坐下．
望下天，睇下雲呀，雀仔呀咁喎．．．

三樣嘢，第一項有時有做，有時冇．
唯有試下放工行去巴士站時行快啲算．
第二項做過三日．
係第四日開始我已經唔記得咗要做．
朝早起身好多嘢攪家麻!
做少一兩樣有幾奇?
至於第三項．．．
還未做過．
我遲啲會試下去九龍公園行下架啦!

治療（一）

無無聊聊，
上網搜了一下醫生開約我的藥．

據醫生所講，朝早食嗰粒只係維他命!
但係唔係普遍維他命，係'再生維他命'!
可以幫我啲死咗既腦細胞再生返出黎．
好以好勁咁喎!

另外晚上有三粒，
一粒血清素，補充我所缺少的．
兩粒中和劑，要黎中和我腦中的壓力荷爾蒙喎(好似係咁)．

已經食咗幾個禮拜．
初初食時我覺得有時會心跳．
但係醫生話唔關啲藥事喎!
(都唔知係唔係既，我上網見到好似會有類似既負作用喎!)
但係食咗藥之後既睡眠質量就真的真的大大改善了!
瞓得唔好呢個問題我已經有咗好耐．
而家瞓得好啲，人都醒神啲!
上堂都冇樁眼瞓啦!

不過呢兩晚又瞓得差咗，
唔通要叫醫生加藥?

我可以點?

昨日才說完，
想不到今天便在沒準備的情況下談到此話題．

老實說，類似的回應，
年輕時我可以義無反顧的說出口．
但人長大了，成熟了，
知道有些事說易行難．
我不肯定自己是否真的可以做到，接受到．
我只知道有些事是不可以輕率的答應的．
但可以說的話，我已說了．

只是有點失望．
失望的是我以為一個心思細密，
做事有條理的人，
應該各樣事也顧慮得到，
應該走每一步路也是諗過度過再行的．
而非走了這麼多步，做了這麼多事後，
還在說我有這些這些顧慮，
所以我那樣那樣．

現在我知道了．
又如何呢?我可以怎樣呢?
雖然我知道若我想的話，
我可以很輕易的便得到自己想要的．
但自己的事，最終還是應由自己作決定的．

戒口

過去一年，看過中醫，現在看西醫．
各有各的飲食禁忌，不能吃的多不勝數．
大致如下：

中醫：
所有凍食凍飲，如雪糕，汽水．
仲有西茶，綠茶，
奶茶則冷熱都唔得．

寒涼食品，如：
所有菇菌，冬菇除外．
豆腐，腐皮，所有黃豆製品，辣的除外．
綠豆，芽菜．
所有蔬菜皆為寒，須要用薑煮才可．
另色淡，質滑的菜如黃芽白，娃娃菜，白菜都唔得．
瓜類亦一樣，除咗節瓜正氣之外．

還有生果都係，好多都唔得．
好似梨，士多啤梨，奇異果，火龍果等，
清甜的山竹更是大忌．
連我最愛的雪蛤燉耶皇都唔得．

西醫則簡單點，
不可吃喝任何有咖啡因的東西，
即係唔飲得咖啡，所有的茶，可樂，葡萄適，
酒更加唔得．
還有還有，朱古力都唔食得!!!!

但係叫我唔食朱古力係無可能架囉!
情緒低落時，工作緊張時就更想!
唔食既話，我驚我會仲嚴重喎!

我試過問醫生，食少少唔怕啩!?
佢話呢啲興奮劑，
食咗個胃會分泌更多胃酸，
就會胃痛架啦!
風水佬呃你十年八年，
我最多都係呃到你幾日啫!

我噚日晏晝試過喝了紅茶．
真係好快就胃痛.....

我快樂

我絶對是個有資格快樂的人．

一家人尚算齊齊整整，身體健康．
財政ok，起碼不用憂柴憂米．
我份人工勉強夠駛．

朋友未算相識滿天下，
但知心的有好兄弟．
還有其他其他，都是隨和，沒甚所謂的人，
亦即謂就得我，和他們一起我多數都做到／得到我想要的．
佢地仲會聽我發牢騷添．
(我也可以是牢騷王 :p )

學習，老實說真的不容易，
但多花時間，付出努力，還應付得到．
成績也可以．
還有班一齊同學仔嘻嘻哈哈．

工作，是現是為止做得做愉快的一份工作．
係忙囉．
但哪間銀行的risk係不忙的?
這裡至少老細撐你，不公平的事會人有出頭．
同事OK，兩個阿哥都是關心我的．
(我甚至覺得佢兩個都係偏心我多一點的 :p )

其它的．．．
我想要的東西，只要不是太昂貴，自己亦可以買得到．
身體抱恙，有人鼓勵放病假，早收工．
工作忙時有人幫．
想去玩時有人陪我癲，
唔開心時有人問候，
考試合格有禮物收．
現在應該是我這生中其中一段最快樂的時間．

所以呢．．．
我應該是快樂的，
該死唔駛病，自己留意一點就可以的了．
再觀察下先啦!

唔想煩

唔想再諗．
唔想自己開唔開心都由其他人講我知．

其實我都唔多覺自己唔開心．
我覺得我OK喎!
煩心的事一定有．
但未至於煩到我咁唔開心．
無理由胃痛都關佢事囉!
應該係工作太忙，壓力大啫!
可能放下假會好啲．

好緊張

收到電郵通知，
二十七號就可以上網睇到成績啦！
好緊張！好緊張！好緊張！

好驚唔合格！
合格的話一定要慶祝！
有人話合格的話會送禮物比我慶祝．
不過有無考試成功禮物都一定要合格至好！
我唔想補考／重讀(touch wood).

回到工作

放了三個星期假，終需回到工作．
我終於發現，以往睡得不好主要是因為工作．

三個星期的假期中，盡量保持作息定時．
一天工作的時間不會比上班時少．
睡眠時間多了一點點，但睡眠質量則提升多多．

現在工作了一個多星期，己好像回到未放假前時般．
睡了上床要輾輾轉轉才睡得著．
天一量便會醒，並且連連作夢．
起床時總像沒睡多久般，還是累．

好明顯就係因為工作壓力，
所以睡不好啦!

購物狂

係壓力下，最好的抒緩方法便是購物．
我係呢個時候會縱容自己花費．
除咗出入會搭多咗的士之外，我仲會亂買嘢．

例一：
昨日午膳時間，係公司溫咗一個鐘頭書後．
最後頂唔順，於是去咗Godiva買咗二百蚊朱古力，
起碼食下朱古力個人唔駛咁灰先．

例二：
今晚八點放工，
行過連卡佛，就走咗去Dior，
買咗講咗好耐都未買既eye cream，
承惠四百六十大元．
我都知係貴，
但係都係嗰句啦!
讀得咁辛苦，無謂刻薄自己．
反正都係用返係自己身上啫!

Study Group

就黎考試啦，所以今日去咗個同學仔屋企．
大家諗住做個study group．
可以一齊溫習．有問題提出討論．
但係作用唔大囉!

大家進度唔同．
想溫既嘢唔同．
溫習方向唔同．
況且時間無多，
大家都只想溫自己想溫既嘢(最少我係)．
而且人多又會傾計．
攪到事倍功半．
如果我今日自己留係圖書館溫，
應該會溫多好多．

不過今日都幾開心．
幾個人有傾有講咁，咁又一日．
仲有今日講既英文應該係我過去幾年講既總和囉．
大學畢業後都冇乜點講過啦!

仲有好彩我今日有去，原來我將兩科既考試日期掉轉咗．
今日同同學仔傾開計至發覺!
好彩為時未晚．影響不大．
聽日真係要認真的溫至得啦!

求醫

今日又去咗睇中醫．
因為個頭由噚日開始就痛．
但係噚晚要返學，去唔到．

初時以為係比風吹親又或者感冒．
原來又係話我寒．
次次都係咁講，好悶．
所以我每次都盡量諗啲問題問吓．

問題一：
如果個人緊張，把脈把唔把得到?
答案係得既．
咁我緊唔緊張呢?
醫師答：之前唔緊張． ==>潛台詞即係而家緊張啦
我：咁而家．．．
醫師答：而家係好緊張．．．

問題二：
點解我成日都喺夜晚六七點時超眼瞓．
但係八點開始就越黎越精神?
醫師話因為我個人虛．
而人既唔知乜乜少陽經(已經唔記得咗係邊條，可能睇返段譽會知道)
係下午三點至六七點，血氣運行會由最強漸轉弱．
加上太陽下山後個人既血氣更差．寒氣更盛．
而我一直太勞累，下一道氣又補唔切，所以會咁．

一般人如果咁攰，夜晚應該會好好瞓．
但係我係晚上仍然又好多嘢做．
一直透支，扯到行晒．
個人又超緊張．
所以到夜晚都係會瞓得唔好．

但係而家係非常時期，唔可以鬆懈．
仲有一個月啫!
加油!!

又：由於頭痛，今日醫師同我按咗幾吓，按完後又真係唔痛喎!掂!
又又：答咗佢今日早餐同午餐食乜後，被嚴肅地｢循循善誘｣了幾句．
　　　但係而我暫時仲未諗到乜食比好，諗到先算!