Tuesday, March 31, 2009

小地震

小休後的第一個工作天,
出奇地早了回到公司,
返到去,係最早既一個.
好靜,但係就見到隔離位個同事個櫃打開晒,冇鎖.
唔通噚晚走得好急?
但係佢平時個櫃唔鎖都唔會打開晒格!

稍後兩個同事回到來,
一見我就話我早,然後就問我係咪知道咗啦?
知道咗?知咩呀?有咩係我應該知嫁?
原來有個同事噚日收到大信封,被炒了.

我們小隊原本第屬於商業銀行部.
上年的一次重組,小隊一分為二.
編制上一半人轉到了營運部.
但工作上仍是一個團隊.
工作性質亦沒變.
對我地黎講就只係在公司結構上的老細轉咗.

受害人原來屬於營運部,上年重組後才轉來.
佢就剛相反,老細沒變,但係其他嘢就唔同晒.
不過係人都知佢同營運部阿姐唔妥(雖則我諗冇人妥嗰個阿姐)

昨日上午十點幾,先由阿哥收到營運部阿姐來電,
一黎就話有有關其他同事既Private & Confidential事講.
講完至同我地小隊阿姐講.
到十一點幾,營運部阿姐同人事部代表黎到派信.

作為全球其中一間蝕水最勁的銀行,
裁員都預咗,估唔到既係負責人的手法.

在公,全個過程都冇問過商業銀行部既人,
連我地香港區主管都唔知.
話炒就炒,要交人,又唔見你交自己既人.
都算,冇人想少個人幫自己做嘢.
但係你要炒既係喺人地地方做嘢既人,點都要知會聲啩.
到炒嗰一刻至通知人,擺到明唔比面,
亦唔比機會人做嘢救人.
再者,人地都要安排工作架!
如果比咗啲重要嘢佢跟,人又比你炒咗,咪比你累死?

在私,人地話晒都係度做咗十幾年,
比得個一個鐘人地執嘢,
仲話要叫人睇住佢執喎!
痴線架,自己又唔睇?
人地而家唔係做錯嘢喎至被炒喎,你當人賊呀?
唔係咁做嘢啩?

Monday, March 30, 2009

煩惱絲

又想整頭髮.
而家個頭唔知想點咁,飛起晒.
頭髮己直了幾年,但我懷疑我不是太適合鬈髮.
想再燙個負離子,但又不想花一整天呆坐在髮舍.
好像很浪費時間似的...

無聊時翻看舊照,上年一月時.
頭髮比現在長一點,好像好看一點.
近幾次理髮都得不到滿意的效果.
總覺得差一點,差一點...
想轉理髮師.
想轉個心情.

如果沒有

想係Youtube找如果沒有的mv.
結果找到這個廣告,覺得好搞笑.
開首的對白和如果沒有的歌詞可是一樣的啊!

Sunday, March 15, 2009

垃圾桶

垃圾桶我常用的有幾個.
有事便會blah blah blah 的在電話,msn中對他們說.
要找個好的不容易.
基本是要是好朋友.
然後要有信心他不會四圍同人講.

很久沒對他說心事.
今晚特然想找他談.
講完了,雖然問題還在.
但都舒服了點.
又要說謝謝了.

禮賓府開放日


較早前看到理工的杜鵑花開得很美,
想起前港督府的開放日應該快到,
上網一找,原來今個星期日便是,
把握機會去逛逛.

那兒很多人,真的很多人.
花...ok 啦,
電視上看起來比較美.
如果人少啲應該會好好多.
地方比想像中細,不過都幾靚.
我懶,唔想寫咁多.
係咁!

當真?

昨日去了舊同事的婚禮,
見到了一位自離職後再沒見過面的同事.

最初見到他望著我很久.
但當時正在和其他人寒暄中,未暇打招呼.

稍後才有機會談話.
他:xxx,是你?我完全唔認得你.
  真係唔認得.
我:(厚著面皮問)係咪因為我靚咗好多呢?
他:係呀,真係靚咗好多!
我:真係?
他:真係嫁!真係靚咗!
我:哇!你再講我會當真嫁!
他:我係講真嫁!
我:多謝!多謝!你真係好好人!

見佢個樣好誠懇,
同埋佢唔係嗰啲口花花既人,
我決定當真,
很高興呢!

梁靜茹今天情人節演唱會

第一次看梁靜茹的演唱會.
一行六人.
揮動著粉紅營光棒,
每一支歌都跟著唱.
好彩冇耐前已經煲咗佢隻精選碟,
所以隻隻都識唱.

可惜歌與歌之間總要關一關燈,
就像cooling off period,
情緒不能連貫下去.
加上梁靜茹的歌都是中板情歌,
快歌欠奉,絶對沒看陳奕迅,張敬軒般high.

然而一個晚上,六個人,一起唱了一晚,
也很快樂.

Saturday, March 14, 2009

你咪理,我愛你,死未?

睇咗呢個劇,都ok既,幾好笑.
佈境同舞台各個效果幾靚,
但正如兄弟話,我有份比錢整既.
好耐都冇比咁多錢黎睇舞台劇啦!

全程主要係歌,
本人最欣賞林二汶的聲音,很好聽!
很明顯佢唱得最好!

還有,四個人不停咁轉造型,
不過無乜大驚喜.
可能因為是第一埸的關係,
有啲蝦碌,有時light cue sound cue出個時間唔對.

但座位很好,是circle的最後一排中央.
看得很舒適(撇除前面那對痴男怨女的騷擾).
謝謝李小姐的訂購服務!

其餘的...
我懶寫,請看李小姐的部落格

Monday, March 2, 2009

脫髮

這幾年斷斷續續的,
都會脫髮.
唔係話正常人每日甩一百幾十條嗰種喎.
係好似人地俗稱鬼剃頭嗰種.
即係頭上會有一處冇晒頭髮.

通常小則就好似一個五蚊銀咁大.
試過最大有成四個五蚊銀咁大.
那時是我最感激阿媽生成我把頭髮咁厚的時候.
因為脫髮範圍咁大都仲可以遮得住!
通常甩到咁常吓就會慢慢生番.
但係由甩到全部生番晒,最長試過要年幾兩年囉!

昨日尖完吹頭的時候發覺我又有脫髮啦.
係太陽穴對上.
範圍大約五蚊銀咁大.
其他地方都是濃濃的,
剩係嗰度稀疏得很,
輕輕一撥便見到頭皮.
一見到就愁.

以前查過脫髮的成因有好多.
可以係遺傳.
可以係壓力.
可以係心理.
可以係營養不良.
又或者係內分泌失調.

我試過問醫生,髮型師,
但係冇人幫到我,
次次都係佢自己好番既.
只可以等!
唉!唔知又要幾時至生得返啦!