請人

唉！已經問過好多人：有冇人介紹呀？

請個人，原來真係好難．
由開始要有相關經驗到只要工作妥當，企理同有責任感．
到而家折墮到開始連Fresh Grad都要考慮．
好鬼煩呀！

心虛

又到Mid-Year Review．

老闆問：佢讚得你好緊要，話你好幫得手，究竟你做過乜令佢咁讚你呢?

我想話佢一問我嗰一刻我真係心虛，唔通佢收到啲小道消息?
傳言已經吹到佢度?
唯有叫自己冷靜．
一向工作上我都係交足貨既!
得到的亦是我應得的，唔駛自亂陣腳!

我反問：em... 你有冇問過佢呀?(即係可唔可以唔問我?又或者我可唔可以唔答?)

老闆：佢同我講話你好識做嘢．
我：可能佢有問題既話會比教多同我傾，咁我又比到一啲佢諗唔到既想法同意見佢啦!

好行既答案，不過要黎應付流流地既老闆，應該夠啦!

諗唔明

如果係我工作能力不足，點解加咁多人工比我？
如果係唔夠人手，點解唔可以加人手？
如果係程序上有問題，又點解講咗咁耐都改唔到？

需手段(續)

做完要做既事,講咗要講既嘢.
當晚效果比想像中好.
而且驗明了邀請了對的人物,對的人數出席.
老板方面,相信他亦得到了想要的資訊.
都係大家互惠互利啫...

耍手段

出黎做嘢,少不免要做一啲自己唔鍾意做既事.
而家終於要淪落到要耍啲手段.
對我黎講,其實不為自保,係為啖氣多.
不平等情況持續得太久了.
唔想有人長期沒付出便永恆的取得所有好處.
我地既嘢,唔係你話想唔做就唔做,想做我就要分比你做的.
況且,我將會說的,全部都係事實.

納納雜

（一）多日無聯絡，一黎就開口鬧人．
　　　唔知咩原因，問又唔答．
　　　令人摸不著頭腦．
　　　可能又要等到有問題先會找你．
　　　這些，我都歸納為不珍惜朋友的表現．

（二）恭喜晒！
　　　我己經好無聊咁係度諗出年三月送乜好！

（三）八月同事輪流放假，
　　　預期又要做到隻屐咁啦！

（四）如果假期就到的話，
　　　可能會去睇世博！

（五）睡房的窗一定要裝返遮光布！
　　　我肯定朝早加下午午睡時的陽光
　　　足以扺消我所有美白精華素同面膜！

（六）討厭樓市暢旺的日子！

（七）我要求唔高，
　　　淨係想多啲時間啫！
　　　點解都咁難？
　　　灰．．．

心中有鬼

一向也有和同事們開類似的玩笑．
但而家唔知係咪我多心定係心中有鬼．
此類玩笑佢地好像開多了．
唔通比人發現了蛛絲馬跡?

工作評核/面試

好憎做appraisal,有乜為呢?
有嘢平時開會講咪得囉!
想我做乜亦可以直接講,
唔駛等一年/半年至講.
仲要自己寫一大篇嘢,好煩好煩好煩.
今次仲要攪到好似見升級試咁!
傾嗰一陣間計就可以知道我工作表現啦咩?
一個人講你唔信,
咁多人講你都應該信啦!
我唔識sell自己.
我唔講做得辛苦可以係因為我捱得!
我冇back log係因為我辦事有效率!

返來了

承舊文，早前唔見了的幾千蚊．
今日收到貓，特然回到我袋中了!
最近咁多支出，都叫做幫補下啦!

又唔見錢

本來是無所謂的．
反正那些獎項只是bonus．

話我知可能是要讓我知道我的表現有人認同．
我的努力有人看到．
但係又係因為政治因素．．．
一次係咁，兩次係咁．．．
幾千港幣，幾百美金咁冇咗．
一年下來加加埋埋都唔少啦!
我等錢駛呀!
最憎人玩政治!

好戲

發覺演技越來越精．
說謊做戲真的可以不眨眼．
明明知道扮唔知道，仲要可以叫得出"係咩?!"
明明係扮唔係，加埋一臉無辜．
我覺得我可以攞獎囉!

不做不做還需做

同自己講過，
假期不上班，不工作．

但最後仍是要在週末死返公司．
仲要連續兩個星期．
雖然每次都只是兩個小時．
不過如果連兩個鐘都唔返．
星期一點算?
又九點?定十點?
我既能量儲備唔夠我做到咁夜喎．
八點幾眼皮已經向下墜．
做得又慢，仲要驚錯，划不來!

而且夜收工即係夜食飯．
又肥仔，又容易會胃潰瘍同胃酸倒流．
全部我都唔想喎!

臨老入O-Camp?

Team Building就應該有Team Building的様子.
花少許錢，請vendor黎搞是應該的．
唔係求其叫班青衣做搞手．
諗啲老土遊戲出黎．
大叫其他人投入啲，有創意啲就得囉！
而家好次成班老人家去大學迎新營咁．
搞乜呀?

讚賞

對於自己的工作表現，我是有信心的．
所以每次有人讚賞，
都會高高興興的照單全收．

現在雖然聽到也是開心．
但禁不住會想：現在的讚賞是不是真心的呢?
又或者有否誇大了呢?
那一點點的自尊我還是有的．

奇奇怪怪

一直抱著世上好人比壞人多的信念．
人對我好，我也對人好．
只是好成咁好似有點怪怪的．

回到工作

放了三個星期假，終需回到工作．
我終於發現，以往睡得不好主要是因為工作．

三個星期的假期中，盡量保持作息定時．
一天工作的時間不會比上班時少．
睡眠時間多了一點點，但睡眠質量則提升多多．

現在工作了一個多星期，己好像回到未放假前時般．
睡了上床要輾輾轉轉才睡得著．
天一量便會醒，並且連連作夢．
起床時總像沒睡多久般，還是累．

好明顯就係因為工作壓力，
所以睡不好啦!

沾沾自喜

放工時，閒談間被問到溫習溫到幾夜．
而家平均溫到一點．
上年考試放假期間就兩三點．
第二朝八點幾九點起身再溫．
對方話，咁都冇眼袋，你keep得好好喎，好犀利喎!
yeah~ \(~o~)/

明知係恭維，我都會沾沾自喜．
係!我膚淺!我認! :p

真係做得好?

近兩個星期，常常要加班，
真的很累．
雖然阿哥常叫我分啲比佢做，
但係佢平時都晚晚八九點至走，
我點好意思比佢呢?
大家一齊加班啦!

阿哥係朱古力愛好者．
櫃中常儲有朱古力，
仲要係唔貴唔買．
久不久也會請我品嘗一兩種．
佢唔係請你食咁簡單，
佢仲會介紹一吓隻朱古力．

之前請過我食VERO的Lemon Drops 同Sesame Pencils，
昨晚送了我一片Amedei的Porcelana．
仲特意介紹，叫我不要小看那小小的一片Porcelana．
原來Porcelana係唯一一種全用Criollo可可豆製成的朱古力．
Criollo是三大可可豆中最稀有的一種，
Amedei則以高價包下了它的夢幻產地委內瑞拉的Chuao小鎮的所有Criollo可可豆，
製成Porcelana，每年只限售二萬盒．

另外今日午膳時，公司冇晒人，
佢又突然走出來，送我一盒Jean Paul Hevin．
哇！又有得食?
電話都唔講住，要同佢傾兩句，講咗多謝先．
佢話阿姐讚我(最近的special task)做得好，
係唔係呀?
仲有阿X同阿Y(Sales Team 兩個阿姐)都讚我喎．．．
有人讚都開心．
起碼辛苦得黎有人(最緊要係老細)知嘛!
但係佢叫我唔好比同事W知囉．

不過隔咗一陣我又諗到啲嘢，
昨天同事W經佢提名，攞咗Employee of the Month，
可能佢怕我冇份會唔開心啩．

但係乜我比人印象係咁小家嫁咩?
佢攞都正常吖，我年資最短，排隊都係佢先啦!
而家佢攞咗，有獎金，我地最少都可以屈餐下午茶．
Yes!

小地震

小休後的第一個工作天，
出奇地早了回到公司，
返到去，係最早既一個．
好靜，但係就見到隔離位個同事個櫃打開晒，冇鎖．
唔通噚晚走得好急?
但係佢平時個櫃唔鎖都唔會打開晒格!

稍後兩個同事回到來，
一見我就話我早，然後就問我係咪知道咗啦?
知道咗?知咩呀?有咩係我應該知嫁?
原來有個同事噚日收到大信封，被炒了．

我們小隊原本第屬於商業銀行部．
上年的一次重組，小隊一分為二．
編制上一半人轉到了營運部．
但工作上仍是一個團隊．
工作性質亦沒變．
對我地黎講就只係在公司結構上的老細轉咗．

受害人原來屬於營運部，上年重組後才轉來．
佢就剛相反，老細沒變，但係其他嘢就唔同晒．
不過係人都知佢同營運部阿姐唔妥(雖則我諗冇人妥嗰個阿姐)

昨日上午十點幾，先由阿哥收到營運部阿姐來電，
一黎就話有有關其他同事既Private & Confidential事講．
講完至同我地小隊阿姐講．
到十一點幾，營運部阿姐同人事部代表黎到派信．

作為全球其中一間蝕水最勁的銀行，
裁員都預咗，估唔到既係負責人的手法．

在公，全個過程都冇問過商業銀行部既人，
連我地香港區主管都唔知．
話炒就炒，要交人，又唔見你交自己既人．
都算，冇人想少個人幫自己做嘢．
但係你要炒既係喺人地地方做嘢既人，點都要知會聲啩．
到炒嗰一刻至通知人，擺到明唔比面，
亦唔比機會人做嘢救人．
再者，人地都要安排工作架!
如果比咗啲重要嘢佢跟，人又比你炒咗，咪比你累死?

在私，人地話晒都係度做咗十幾年，
比得個一個鐘人地執嘢，
仲話要叫人睇住佢執喎！
痴線架，自己又唔睇?
人地而家唔係做錯嘢喎至被炒喎，你當人賊呀?
唔係咁做嘢啩?

雞碎咁多

本來一早預咗入得嚟，頭兩年都冇花紅架啦．
點知今日阿哥話比我知有．
但係個數就．．．．
咪就係雞碎咁多囉！

本來預咗冇，突然又有，係應該高興既．
但係有同事同我講，佢做咗咁耐，
未試過花紅係少過一個月糧架囉．
我今次，係連半個月都冇．

以我個人多心，多嘢諗既性格．
好自然就會諗，得咁少．
係人人都咁少吖，定係得我係咁少呢?
雖然阿哥講過，唔好失望，
其實個個都差唔多，都係得咁少，
不過我知道應該係我最低囉．．．

唯有不斷催眠自己：本身預咗冇，而家係額外既！
賺咗架啦！好阿Q！

之不過．．．
都係嗰句，雞碎咁多，做得啲乜？