咖啡癮

似乎已經上了咖啡癮．

今天沒喝，於是．．．．
十二點起床，食嘢，
一點多開始溫習．
兩點鐘成功瞓著．
四點起身再溫．
五點出門做facial．
六點facial時間＝休息時間．
八點幾回到家．
九點多再溫，十點又再瞓．

嗯．．．
似乎有心要溫習的話都係要喝杯咖啡至得．

焗香蕉

一個人無聊在家，溫書溫到悶．
最好就係摷嘢食．
屋企有兩隻熟到起梅花點的蕉．
想起早幾日係街食過的燒香蕉．
於是自己又試吓整．

先將香蕉開邊，切開小件．
然後灑少許黃糖．
連皮放入已預熱的焗爐內焗．
焗到糖溶，蕉皮變黑後就得啦!
加埋Bailey's 雪糕一切食，勁正!

網球肘

手痛，膝痛，
以為係天氣凍，引發之前摔倒的後遺症．
所以今日去咗睇跌打．
點知師傅話我隻手有啲網球肘．
有事的係前臂近手踭位置，
同埋手掌近手腕位．

一黎就話要針．
針前師傅問我食咗嘢未．
原來空肚針好容易會暈喎．
好彩都係食咗嘢先去啫．
一共落咗十二針．
有啲拮落去時都幾痛．
爭啲流眼淚．

落晒針，師傅又問我平時易唔易暈．
我答我血壓低，常踎低起身見頭暈．
師傅聽完就話咁就齋針唔電啦．

針咗十五分鐘．
起咗針．
師傅同我按摩，拉了幾下．
再敷冷藥，敷八個鐘．
拆藥後要等一個鐘至可以濕水，
否則好容易有風濕．

至於膝痛師傅睇都唔睇就話唔關事．
只係個人太虛，所以會膝痛．
乜都冇做過．

謝謝大家都愛我

好攰！好攰！
昨天五時十五分起床．
忙了大半天．

要跟李小姐說句對不起啦！
昨天流程跟得不足，出了錯漏．
亦要跟其他姐妹說不好意思！
未能幫大家將所有東西收拾好便要先走了！
還有還有幫我訂枱的朋友．
雖然最後都冇去幫襯． :p

之後因為一己的無聊．
堅持要呼吸(所謂的)新鮮空氣．
死到入去山長水又遠的地方．
明明唔夠瞓加長期體力透支加今天晨早九點要上堂．
都要hea到十一點幾到返到家．

如果你問我昨天開唔開心，
我既答案係開心．
因為我知道大家都愛我啦！

就係咁橋

今早要上堂，由上午九時至下午二時，
上課時不停的抄筆記同msn．
到大約十二時miss了一個來電．
留言一直沒聽．

上了五個小時的課後，拿拿臨去行下街先．
一個人係尖沙咀逛了兩個小時．
又到我最愛的崇光百貨購物．
係常幫襯，有VIP的店買了兩件衫．
原本想買三件的，好在忍到手．

離開上了巴士後醒起仲有留言未聽．
聽到之後真係嬲爆．
原來今個月生日，該店有coupon送，收我去攞囉!
如果我早啲聽留言，
咁就可以攞埋，甚至用埋佢啦!
激死!

姊妹裙

今日放學後行咗去百利攞埋小翠同阿玲條姊妹裙啦！
下個星期個個都有裙著啦！
不過我冇Check，有問題唔好問我！

另外早兩日去覆診．
又磅了一下，又輕咗！
所以我肯定我條裙要放寬唔係我問題囉！
一定係上次度身時佢度得唔準！ :p

一人遊

悶納的週日下午．
一個人出門，
走到巴士站，上了車．
耳聽著<安靜了>，
用隨身相機拍下沿途風光．

四十五分鐘的車程，
最後到了屯門總站．
往人多的方向閒逛，
到了屯門市廣場，
很吵，很迫．

三十分鐘後，回到下車的總站．
等十分鐘車．
四十五分鐘後回到起點．

回程時，聽的是梁靜茹的<勇氣>．

♪　♪　♪　♪　♪　♪　♪　♪　♪　♪　♪　♪　♪　♪　♪　



♪　♪　♪　♪　♪　♪　♪　♪　♪　♪　♪　♪　♪　♪　♪　

由得我啦

女孩子特別多護理要做．
今晚特地過了一轉銅鑼灣就係為咗做久違了的其中一項．

呢幾晚都特別夜瞓，一天大概六小時．
昨晚更只有五個小時，真的不夠．
加上血壓底，成個人也恍惚起來．
工作了一天，要做的事並沒減少．
反而積壓得更多．
枱面凌亂，又唔見文件．
真的沒精神再同人social．

偏偏做護理行業的小姐都喜歡與人寒暄．
我只好隨便敷衍數句．
誰知離開上了巴士後，
竟然收到那位小姐的長長sms．
大意是覺得我好多心事，全程冇笑過．
如果係佢做得唔好要話佢知．
知我下個月生日，仲祝定我生日快樂．
攪到我仲要覆個msg比佢話唔關佢事．
係我自己攰啫．
都唔知係佢entertain我定我entertain佢?!
大家都唔熟，你由得我啦!

功課

今晚超額完成了醫生給我的功課．
快步由新蒲崗走到九龍城．
九龍城走回東頭村．
再返新蒲崗．
四十五分鐘．
出了一身汗．

He's just not that into you

尚未看完．
完成了大半，己覺獲益良多．
有啲情況常發生．
只是自己會在找藉口，尋解釋．
實情就係咁簡單．

好多事就係咁．
發生係自己度便會看不見．
自己曾也同樣如此對人．
亦因為同一個原因．

Oprah Winfrey說得對：
This book should be on every single woman's nightstand!

現在更有動力向前走了!

Angels & Demons

放工後趕往旺角看電影．
看的是Angels & Demons．
想看了很久．
但電影剛上時正在如火如荼的準備考試中．
到考完試，人地個個都睇完啦!

讀原著小說己經是得久以前的是．
細節己忘了，劇情只記得個大概．
記得太清楚的話，有了比較，電影反而不好看．
現在帶著呢個程度的記憶去看電影剛好．

電影都OK，叫做緊湊．
由於細節都忘了，唔悶．
個人認為比Da Vinci Code好看．
總覺得柯德莉塔圖和我想像中的Sophie不像．

看過Dan Brown幾本小說，
本本的故事結構都差不多．
故事發展的起承轉合都是一式一樣的．
誰是好人，誰是壞人．
何時有人死，何時有危機，
看了一本，其它便自然知道．

Harry Potter and the Half-Blood Prince

剛在Youtube看了Trailer，
年幼的Tom Riddle和想像中一像．
特技令書中，幻想中的畫面成真．
夢工場果然有一套．
大家想想中港台的金庸小說改編電視及電影，高下立見！

1. Harry Potter and The Half Blood Prince (Official Trailer 1) [HD]



2. Harry Potter and The Half Blood Prince (Official Trailer 2) [HQ]


3. Harry Potter and the Half Blood Prince - Official Trailer 3 [2009] [720p HD]

4. Harry Potter and the Half Blood Prince - Official Trailer 4

偷懶半天

上午考完第二科．
一早預咗會考得麻麻．
入到去果然啦．
statute唔記得section 幾．
案例名又唔記得．
成個答案好以淨係吹水咁．
無law back up....
死咗一半啦!

但係考完後，點都要放鬆一下．
先到apm食個lunch.
我已經好耐冇食午飯啦!
(溫習時為節省時間只會食早餐同一個飽飽下午茶)
今天吃的是意粉，味道好一般．

跟手係apm行咗陣．
買咗對新波鞋
(事實又一次証明shopaholic唔買嘢係唔得既!)
原想買嗰對Nike，好看點，但係冇air囉．
所以最後揀咗對冇咁靚，但係有air既．
舒服啲麻!

諗過睇戲，可惜揀唔到．
之後轉移陣地，出咗旺角行朗豪坊．
食咗個tea.
有cheese cake, brownie　同hot hazel nut chocolate!
我冇計過卡路厘，
淨係知道而家八點幾都仲好飽．

完完全全是放縱的一天．
因為放縱，所以放鬆．
明天再努力!
奸爸爹!

點算?

五日假期．
如意算盤是一天大概溫25-30%，
即係三四天會溫完一次，
第五天係用黎重溫同睇past paper既，
但係噚日只係溫咗約15%，
今日得返一半．
點算?點算?

購物狂

係壓力下，最好的抒緩方法便是購物．
我係呢個時候會縱容自己花費．
除咗出入會搭多咗的士之外，我仲會亂買嘢．

例一：
昨日午膳時間，係公司溫咗一個鐘頭書後．
最後頂唔順，於是去咗Godiva買咗二百蚊朱古力，
起碼食下朱古力個人唔駛咁灰先．

例二：
今晚八點放工，
行過連卡佛，就走咗去Dior，
買咗講咗好耐都未買既eye cream，
承惠四百六十大元．
我都知係貴，
但係都係嗰句啦!
讀得咁辛苦，無謂刻薄自己．
反正都係用返係自己身上啫!

Study Group

就黎考試啦，所以今日去咗個同學仔屋企．
大家諗住做個study group．
可以一齊溫習．有問題提出討論．
但係作用唔大囉!

大家進度唔同．
想溫既嘢唔同．
溫習方向唔同．
況且時間無多，
大家都只想溫自己想溫既嘢(最少我係)．
而且人多又會傾計．
攪到事倍功半．
如果我今日自己留係圖書館溫，
應該會溫多好多．

不過今日都幾開心．
幾個人有傾有講咁，咁又一日．
仲有今日講既英文應該係我過去幾年講既總和囉．
大學畢業後都冇乜點講過啦!

仲有好彩我今日有去，原來我將兩科既考試日期掉轉咗．
今日同同學仔傾開計至發覺!
好彩為時未晚．影響不大．
聽日真係要認真的溫至得啦!

求醫

今日又去咗睇中醫．
因為個頭由噚日開始就痛．
但係噚晚要返學，去唔到．

初時以為係比風吹親又或者感冒．
原來又係話我寒．
次次都係咁講，好悶．
所以我每次都盡量諗啲問題問吓．

問題一：
如果個人緊張，把脈把唔把得到?
答案係得既．
咁我緊唔緊張呢?
醫師答：之前唔緊張． ==>潛台詞即係而家緊張啦
我：咁而家．．．
醫師答：而家係好緊張．．．

問題二：
點解我成日都喺夜晚六七點時超眼瞓．
但係八點開始就越黎越精神?
醫師話因為我個人虛．
而人既唔知乜乜少陽經(已經唔記得咗係邊條，可能睇返段譽會知道)
係下午三點至六七點，血氣運行會由最強漸轉弱．
加上太陽下山後個人既血氣更差．寒氣更盛．
而我一直太勞累，下一道氣又補唔切，所以會咁．

一般人如果咁攰，夜晚應該會好好瞓．
但係我係晚上仍然又好多嘢做．
一直透支，扯到行晒．
個人又超緊張．
所以到夜晚都係會瞓得唔好．

但係而家係非常時期，唔可以鬆懈．
仲有一個月啫!
加油!!

又：由於頭痛，今日醫師同我按咗幾吓，按完後又真係唔痛喎!掂!
又又：答咗佢今日早餐同午餐食乜後，被嚴肅地｢循循善誘｣了幾句．
　　　但係而我暫時仲未諗到乜食比好，諗到先算!

Pole Dance

朋友帶我到尖沙咀的酒吧，
觀賞生平第一次的Pole Dance．

從來，印象中的鋼管舞都是在一個氣氛熾熱，
燈光灰暗，音樂震耳的地方中的．
舞蹈員會穿著性感舞衣，
嘴唇半張，雙眼半閉，
隨著音樂，火辣的擺動著身體，四肢，
柔若無骨，意態僚人，
卻又有力的在鋼管上做出難度極高的動作．
令人驚訝之餘，又會想入非非．

然而昨晚的環境，音樂總是不對．
吧枱上鑲了兩枝鋼管．
舞蹈員就是在吧枱上表演．
但吧枱旁泊著兩張枱，係貼住泊，並且有顧客在座．
即係話如果腳踏六七吋Platform高跟鞋的表演者動作大點，
轉個圈大點，對鞋就會哼到客人個頭．
可能就係咁，跳得硬係唔夠放．

另外音樂只是一般快歌．
不是意帶挑逗那種．
我記得最差的一隻令我想起Eric Clapton．(-_-")
(我可是頗喜歡他的,但不是用作伴鋼管舞囉!)

舞蹈員有兩位，一位亞裔人(估計係泰國人)．
另一位則金髮(估計是染的)．
身材高佻，均勻．
舞姿都Ok，一樣有在圍著鋼管飛轉，倒吊等難度動作．
但並沒帶給人暇想的那種感覺．

個場最Ok既地方，係冇乜人食煙，
但係啲侍應就怪啲囉!

禮賓府開放日

較早前看到理工的杜鵑花開得很美，
想起前港督府的開放日應該快到，
上網一找，原來今個星期日便是，
把握機會去逛逛．

那兒很多人，真的很多人．
花．．．ok 啦，
電視上看起來比較美．
如果人少啲應該會好好多．
地方比想像中細，不過都幾靚．
我懶，唔想寫咁多．
係咁!

梁靜茹今天情人節演唱會

第一次看梁靜茹的演唱會．
一行六人．
揮動著粉紅營光棒，
每一支歌都跟著唱．
好彩冇耐前已經煲咗佢隻精選碟，
所以隻隻都識唱．

可惜歌與歌之間總要關一關燈，
就像cooling off period，
情緒不能連貫下去．
加上梁靜茹的歌都是中板情歌，
快歌欠奉，絶對沒看陳奕迅，張敬軒般high．

然而一個晚上，六個人，一起唱了一晚，
也很快樂．